Ena ika28 ni Okosita 2021, rau sere mai o Brother Aleksandr Lubin kei Brother Anatoliy ena vanua rau vesu tu kina me rau wawa veilewai. E caka qori ni oti nona kerekere na Mataveilewai ni Dodonu ni Lewenivanua e Urope (ECHR) vei ira na vakailesilesi e Rusia. Dina ni rau tautauvimate, ia rau vesu tu me dua veimama na vula e Kurgan e Rusia. Ena rawa ni rau bala tale e valeniveivesu ni oti na macala ni nodrau veilewai.

Ena ika13 kei na ika14 ni Julai 2021, era curuma vakaukaua na ovisa nodra vale na iVakadinadina i Jiova e Kurgan. Rau maliwai ira na tacida era vesu o Brother Isakov e yabaki 56, kei Brother Lubin e yabaki 65.

E tauvi Brother Lubin na mate ni sala ni dra, tubu ni dra, e vakaleqai tale ga na sela ni yagona. Ena vinakati gona me dau soli vua na misini ni cagi (oxygen) me 16 na aua ena dua na siga, qai caka vua eso na veiqaravi vakavuniwai. Ia e vakatabui me caka qori ena gauna e vesu tu kina. E dredre me taubale qai vinakati e dua me vukei koya me duri. E tautauvimate tale ga o Tatyana na watina, qai tauvi koya vakava na strouk.

E tauvi Brother Isakov na kenisa ni dra, qai ramusu vakavica nona suitu kei na sarisarina. E vinakati gona me dau vakayagataka na idabedabe qiqi (wheelchair). Ni vesu tu, e tarovi me caka vua na veiqaravi vakavuniwai (chemotherapy). E vakatabui tale ga me soli vua na wainimate me vakalailaitaka nona mosi. Ka ni rarawa ni tauvi koya tale ga na COVID-19 ena gauna e vesu tu kina.

Vica vata na macawa nodratou kerea tiko na nodrau loya in mataveilewai me rau sere na tacida qo, ia e sega ni vakadonui. E yavutaki na vakatulewa qori ena nodra ivola na vuniwai ena valenibula e Kurgan. E volai tu kina ni rau sega ni tauvimate o Brother Lubin kei Brother Isakov, e sega tale ga ni dua na ka ena vakaleqa na nodrau vesu.

Ena ika8 ni Okosita 2021, e vakaraitaka nodrau loya ina ECHR na veika rau sotava na tacida. E mani kerea na ECHR ina valenivolavola ni dauveibeitaki e Rusia me rau sereki na tacida. Ena ika24 ni Okosita 2021, rau lai laurai tale vakavuniwai na tacida ena valenibula e Kurgan. Era mani kaya na vuniwai ni rau tauvimate o Brother Lubin kei Brother Isakov, e sega gona ni dodonu me rau vesu.

Dina ni rau tautauvimate qai tusaqati tiko o rau na tacida qo, meda masulaki rau mada ga me rau na yalodina tiko ga. Eda kila ni o Jiova ena “vakaraitaka nona kaukaua” vei rau.—2 Veigauna 16:9.