Levu na tacida e Rusia era vosota tiko ena marau na nodra vakacacani, me vakai Brother Oleg Danilov, kei Brother Vladimir Ermolaev, Jr. Rau kaya na tacida tagane gugumatua qo ni vakayaloqaqataki rau na nodra ivakaraitaki ni yaloqaqa, kei na dei ni nodra vakabauta na wekadrau era iVakadinadina i Jiova.

Ena 1958 rau papitaiso me rau iVakadinadina i Jiova o Fyodor kei Yekaterina Rigel, na tubui Oleg. Me vaka nira tusaqati tiko ena gauna qori na iVakadinadina i Jiova, era vaqaqara na vakailesilesi ena nodrau vale. Oti era vesuka na nodrau vale kei na qele, qai totogitaki vakailavo o Fyodor. Ia e sega ni yalolailai, e vukei ratou tiko ga nona vuvale me ratou dei ena nodratou ituvatuva vakayalo.

E rua na luvedrau na Rigel, o Alfred kei Ella (na tinai Oleg). Ni rau se gone, rau dau tusaqati qai vakalialiai. Ia e dei na nodrau vakabauta, rau qai yalodina tiko ga. A sega ni via curu ena mataivalu o Alfred mani vesu me tolu na yabaki.

Qori tale ga na ka e sotava o Oleg Danilov. E vesu me tolu na yabaki ena vuku ni nona vakabauta. A vesu ena Maji 2021, e sega tale ga ni sotavi watina o Nataliya, kei rau na luvena tagane o Ilya kei Nikita. Ia dua na ka na nodratou nuitaki Jiova vakavuvale, ratou nuidei tale ga ni na vukei ratou me vaka ga e cakava vei rau na tubuna kei nona momo.

E kaya o Oleg: “Au dau vakasamataka vakalevu na sala era vosota kina na wekaqu kei ira na mataveitacini na veitusaqati ena veiliutaki ni Soviet Union. Qori e ivakadinadina matata ena kaukaua ni yalo tabu i Jiova. Au nuidei tale ga ni rawa ni keitou na vosota vakavuvale na veivakacacani, qai marau tiko ga.”

Ena 1953, e vulica na iVolatabu o Anna Ermolaeva, na bubu nei Vladimir, Jr. E imatai tale ga ni lewenikoro e Serebrovo me papaitaiso me iVakadinadina i Jiova ena yasayasa o Irkutsk. Dua na ka nodra veitusaqati na tiko volekati koya, wili tale ga kina o tinana e sega mada ga ni via vosa vua.

Nira kila na vakailesilesi ni cakacaka vakavunau tiko o Anna, era beitaki koya ni vakaleqai luvena o Vladimir, Sr. na ka e cakava tiko. Era vakarerei koya tale ga nira na kauti luvena.

Era mani vola e dua na ivola na mataveitacini mera vakamacalataka kina nona ivakaraitaki vinaka o Anna. E kauta na ivola qori e dua na tacida tagane qai solia vei Nikita Khrushchev, e vakaitutu levu tiko ena gauna ya. Oti e kaya sara o Khrushchev me caka e dua na veivaqaqai. E mani bokoci na veika e beitaki kina o Anna, e sega tale ga ni kau o luvena.

E dua tale tiko ga na luvei Anna yalewa, o Nadezhda. Ena 1970, e curu e valenibula ni mosi kaukaua na ketena. E qaravi vakavuniwai me kilai kina na mate e tauvi koya tiko. Ratou kaya na vuniwai me soli vua na dra ena gauna ni veisele. Ia rau sega vakadua ni cakitaka na veitinani na nodrau vakabauta. Ratou sega ni mani muria na vuniwai na ka rau vinakata, qai tini veicalati kina na dra e soli vei Nadezhda. Ka ni rarawa ni mai takali ni oti ga vakalailai na veisele. Ratou saga na vuniwai me ratou vunitaka nodratou cala, ni ratou vakaucacataki Anna ena niusipepa. Ratou kaya tale ga ni vakavuna ga o koya “na mate nei luvena.”

E tarai Valentin na wati Anna na ka e yaco qori. Dina ni sega ni via muria na ivakavuvuli vakaivolatabu, ia e vakadonui Anna ga me vakavulici rau na luvedrau ena iVolatabu. Ia ni raica nodra veitokoni na mataveitacini vei ratou ena gauna dredre ya, qori e uqeti koya me vulica na iVolatabu, qai papitaiso sara.

Rau sega ni cegu ni vakavulici luvedrau tiko ga o Vladimir, Sr me muria na ivakavuvuli vakaivolatabu. Toso na gauna, e vakamautaki Lyubov, e dua na tacida yalewa yalodina. E dua na luvedrau tagane, o Vladimir, Jr, rau qai vakavulici koya tale ga me dau vakaliuca na veika vakayalo.

Ena Feperueri 2020, era vaqaqara na vakailesilesi ena nodrau vale o Vladimir, Jr., kei Valeriya na watina. E vesu o Vladimir, Jr. qai sere me lai vakatatabutaki i nona vale me rua na vula. E waraka tiko ena gauna qo na macala ni nona veilewai. E beitaki ni tuvanaka tiko na cakacaka ni isoqosoqo e vakatabui, ena rawa ni vesu me 15 na yabaki. Ia e sega ni via vakasamataka qori o Vladimir, Jr., e uqeti koya tiko ga vakalevu na nodratou ivakaraitaki ni yalodina na nona itubutubu, kei rau na tubuna.

E kaya o Vladimir, Jr.: “E ka dokai meu vakacacani ena vuku ni yaca i Jiova. Ratou sotava tale ga na noqu itubutubu kei rau na tubuqu na ituvaki dredre, ia ratou yalodina tiko ga. Au na muria tale ga na nodratou ivakaraitaki.”

Me vakai Oleg kei Vladimir, Jr., e levu tale ga na tacida e Rusia era vuli ena nodra ivakaraitaki na wekadra yalodina. Meda kua vakadua ni guilecava na nodra ivakaraitaki ena veigauna sa oti, kei ira tale ga era vosota tiko na veitusaqati ena gauna qo. Meda saga tale ga meda “vakatotomuria na nodra vakabauta.”—Iperiu 13:7.