Ena ika4 ni Feperueri 2020, e tauca na Mataveilewai o Zheleznodorozhniy e Khabarovsk, e Rusia, na lewa me baleti Brother Stanislav Kim kei Nikolay Polevodov. E kaya na dauveibeitaki me rau vesu me tolu na yabaki ena vanua era dau vakacakacakataki kina na kaivesu. Ia ena rogoci na ikarua ni nodrau kisi ena dua tale na Mataveilewai ena tauni qori.

Ena ika10 ni Noveba 2018, rau vesu o Brother Kim kei Brother Polevodov ena dua na vale ni kana e caka tiko kina e dua na soqo ni veivakamarautaki e Khabarovsk, ra qai tiko kina e sivia ni 50 na tacida. Qori e sega ni soqo ni lotu. Ni caka tiko na soqo, era curu yani na ovisa kei ira na dauveivaqaqai, ra qai vesuki ira na tu e kea. Ratou vesu me ratou wawa veilewai me sivia e rua na vula, vesu tale ga me vica na vula e vale o Brother Kim, Brother Polevodov, kei Brother Vitaliy Zhuk.

Na lewa e tau ena ika4 ni Feperueri, rau beitaki kina o Brother Kim kei Brother Polevodov ni rau vakaitavi tiko ena soqo qori. Ena dua tale na kisi, rau beitaki tale ga kei Brother Zhuk, kei na tolu tale na tacida yalewa vei ira na vakailesilesi. Rau beitaki o Brother Kim kei Brother Polevodov ni rau tuvanaka na soqo qori. E se bera ni macala na siga me rogoci kina na lewa.

E duatani sara nodrau kisi o Brother Kim kei Brother Polevodov, ni rau beitaki ena rua na cala ena duavata ga na gauna. Ratou vakatulewataka gona na dauveivaqaqai me duidui na gauna me rogoci kina na nodrau kisi. Rau na veilewaitaki o Brother Kim kei Brother Polevodov, ena rua na mataveilewai e Khabarovsk.

Rau vakawati na tacida tagane qori, rau vakaluveni tale ga. Eda kila ni o Jiova ena solia vei rau kei na nodrau dui vuvale na yalo tabu me taqomaka na lomadra kei na nodra vakasama, me rawa nira yalodina tiko ga nira vakatovolei.—Filipai 4:7.