Ena ika19 ni Janueri 2021, e sega ni vakadonuya na mataveilewai ni yasana na Kemerovo Regional Court e Rusia, na nodrau kerekere o Brother Sergey Britvin kei Brother Vadim Levchuk. Sa na tekivu qo na kedrau itotogi me rau vesu me va na yabaki. Ia e laurai ni rau sa cakacakataka oti e sivia e tolu na yabaki na kedrau itotogi qori. Oya nodrau wawa veilewai tu e valeniveivesu rau qai vakatatabutaki tale tu ga e vale. Koya gona, rau na bala ga e valeniveivesu me voleka ni dua na yabaki. Rau vakadeitaka me rau yalodina tiko ga, rau qai vakayagataka vinaka na gauna rau vesu tu kina qori.

Ni vakarau oti nodrau veilewai, rau doudou ni tukuna nodrau vakabauti Jiova kei na veivakalougatataki rau vakila.

E kaya o Sergey: “Cava ratou namaka na dauveibeitaki meu cakava? Meu kua ni yalodina vei Jiova? Na noqu vakabauti Jiova e vukei au meu dua na tamata vinaka, meu dua tale ga na lewenivanua vinaka e Rusia. Au vakavinavinaka vei Jiova ni vukei au meu vaqaqacotaka tale noqu bula vakawati, meu veisautaka tale ga noqu itovo. E vakainaki na noqu bula, au nuidei tale ga ena veigauna se bera mai. Na noqu veiwekani kei na Kalou o Jiova e bibi duadua vei au. Se mani cava au beitaki kina au na mareqeta tu ga noqu veitokani kei koya.”

E kaya o Vadim: “Gauna kece au veilewai kina au vakila tu ga na vakacegu ni tokoni au o Jiova! Se mani cava e vakataulewataki vei au e bibi duadua na nona vakadonui au na Kalou. Kuria ya, se mani vanua cava ga au tu kina au na saga meu bucina na itovo e vakamarautaka na Kalou me vaka na loloma, marau, vakacegu, yalololoma, vakabauta, yalomalua kei na lewa matau.”