27 JANUERI, 2022
RUSIA

Rau Yaloqaqa na Tacida ena Veivuke i Jiova

SARAVA/ROGOCA

Ena vakarau tauca na mataveilewai na Kirsanovskiy District Court of the Tambov Region mai Rusia, na lewa me baleti Brother Anton Kuzhelkov, kei Brother Nikolay Prokhorov. E se bera ni kerea na dauveibeitaki na kedrau itotogi.

Veitaravi ni Gauna

Tiseba 21, 2020

Rau beitaki ni rau tuvanaka tiko na cakacaka ni isoqosoqo e vakavuna na tikoyavavala
Tiseba 24, 2020

Ratou vaqaqara na ovisa ena 19 na vanua, wili kina nona vale o Anton. E kau me lai vakatarogi ena dua na vanua e 350 na kilomita na kena yawa mai na nona vale. E vakatarogi tale ga o Nikolay, qai vakatabui me gole ina dua tale na vanua
Tiseba 25, 2020

Sega ni vakatarai o Anton me lesu i nona vale, qai vesu tu me wawa veilewai
Okosita 30, 2021

Kau o Anton ina dua tale na valeniveivesu me wawa veilewai kina

Kedrau iTukutuku

Anton Kuzhelkov

Sucu: 1993 (Sortavala, Republic of Karelia)

Me baleti koya: E qase vei ratou na le tolu na veitacini tagane. Ni se gone, e taleitaka na siwa, kei na vakasisisi ena waicevata. E vakavulici koya o tamana ena tara vale

Papitaiso ena 2007. Rau vakamau kei Alyona ena 2015

Ka e Tukuna na Watina o Alyona a

Na dredre cava o sotava ni o sikovi Anton?

E lekaleka ga na gauna ni veisiko. Vakarua ena dua na vula au na lai kerea na dauveivaqaqai meu sikovi Anton. Au dau lomaleqataka vakalevu qori. Ena vinakati tale ga meu dikevi vakavuniwai me kilai ni sega ni tauvi au na COVID-19, me rawa niu lai raici koya. E sau levu na veiqaravi qori.

Gauna qo e vakatabui tiko na veisiko. Au marau ga ni sa tekivu rogoci na nona kisi ni veilewai, e vakatarai tale ga meu tiko kina. Ia na siti e caka kina na veilewai, e rauta ni 100 na kilomita na kena yawa mai vale.

Cava e vukei watimu me vosota nona vesu?

E vukei koya nona dau masuti Jiova mai vu ni lomana. Eso na gauna e tagi ena gauna e masu kina. Ia e vakila tu ga na veivuke i Jiova ena ituvaki kece e sotava. . . . E saga tale ga me vakasamataka na nona ibulibuli. Kena ivakaraitaki, ni taubale e lomanibai ni valeniveivesu ena vakaraici ira na manumanuvuka. . . . E dau vakasamataka vakatitobu na nona vuku na Dauveibuli, kei na vosa vakatautauvata i Jisu me baleta na siparo. . . . E vukei koya qori me marau tiko ga.

Nikolay Prokhorov

Sucu: 1964 (Morshan, Yasayasa o Tambov)

Me baleti koya: A lewena tu na mataivalu. E taleitaka na qalo, kei na gade

Ena 2008, rau vakamau kei Yelena. E dua na luvedrau tagane, e dua tale ga na yalewa. E vulica na iVolatabu ni raica na nodra itovo vinaka na iVakadinadina i Jiova. Papitaiso sara ena 2008

Ka e Tukuna

Bau dua na gauna o vakila na veivuke i Jiova?

[Niu] sotava mada ga na veika dredre, au vakadinadinataka tu ga nona vukei [au] o Jiova. . . . Dua na gauna era saga na ovisa meu tukuna niu vakaitavi ena “basulawa.” . . . Na levu ni noqu rere au vakasamataka sega ni macala au rawa ni yalodina tiko ga. Ia au masuti Jiova qai kerei koya me vakaukauataki au, meu kua tale ga ni rere. Ratou raica na ovisa niu sa cuva tu qai masu. E taroga sara e dua vei ratou: “Cava o masuta tiko?” Au kaya: “Au kerei Jiova meu kua ni vakalomalomani au.” Au lai nanuma kina na Aisea 54:17. Au kila ni sega ni dua na ka ratou rawa ni cakava vei au, qori e vakayaloqaqataki au sara ga. Ratou raica tale ga na ovisa niu sega ni rere, ratou mani sega tale ni vakatarogi au. Ratou kerea mada ga meu kua ni yalocataki ratou.

Era vukei kemudrau vakacava na mataveitacini?

Dua na ka na levu ni nodra vukei keirau. Dina nira rawa tale ga ni tusaqati, ia era veitaratara ga mai vei keirau. Era qiriti keirau tale ga mai na tacida ena so tale na vanua e Rusia kei vanuatani.

Levu era vukei keirau ena gauna dredre qo. Era gole mai ena vanua ni veilewai mera tokoni keirau. . . . Na nodra vakaraitaka na loloma vaKarisito, e dua na ivakadinadina levu vei ira na vakailesilesi ni veilewai. E uqeti keirau sara ga me keirau yalodina tiko ena [gauna dredre qo].

Eda nuidei ni o Jiova ena vakaukauataki ira tiko ga na tacida nira vakacacani.—Vosa Vakaibalebale 1:33.

a E sega ni rawa ni vakatarogi o Brother Kuzhelkov ni vesu tiko me wawa veilewai.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU