Ena vakarau tauca na mataveilewai na Metallurgichesky District Court of Chelyabinsk mai Rusia na lewa me baleti Sister Valentina Suvorova, e yabaki 73. a E se bera ni kerea na dauveibeitaki na itotogi me tau vua.

Valentina Suvorova

• Sucu: 1948 (Sorovskoye, yasayasa o Kurgan)

• Kena italanoa: Dau qasenivuli tu i liu ena Chelyabinsk Music School me sivia na 30 na yabaki. E taleitaka na teitei, danisi kei na vakarogo sere.

  Rau vakamau kei Vladimir ena 1973. E takali ena vica na yabaki sa oti na luvedrau tagane o Igor ni tauvi koya na kenisa. Sa qai takali tale ga o tinana kei tacina.

Ena ika26 ni Maji 2019, era curuma vakaukaua na ovisa era tauri dakai e sivia ni 20 nodra vale na tacida e Chelyabinsk kei Yemanzhelinsk. Dua na gauna balavu nona vaqaqai tiko o Valentina, e yabaki 73. E qai veilewaitaki ena ika5 ni Tiseba 2019. Na vuna? Ni wilika nona iVolatabu qai vakamacalataka vei ira eso tale na nona vakabauta. E vakatabui me gole ina dua tale na vanua. E beitaki tale ga o Vladimir ni daubasulawa ena vuku ni nona vakabauta.

Qo na ka e kaya o Valentina nira curuma vakaukaua yani na ovisa era tauri dakai na nodrau vale ni rau moce tu: “Sega mada ga ni keirau tavoi, se me keirau seru se vakaisulu vinaka. Era yanaraka kece na ka e tu i loma ni vale, ra qai vaqaqara ena kovate, neirau kato ni sasauni, na bausi, kei na taga ni sulu. . . . Era vaqaqara ena vanua kece ga, e loma ni kuro, na ilatilati kei na neirau iyaya ni moce.”

E leqataka o Valentina na veitusaqati e caka vua, ni sa qase qai tautauvimate.

Ia e kaya ni vukei koya vakalevu me yalodina tiko ga na nona dau vulica wasoma na iVolatabu. E kaya: “Noqu dau dikeva na tikinivolatabu e veimataka, vakasamataka vakatitobu na ka au wilika qai bulataka, e vukei meu vosota na ituvaki dredre kece.”

E kaya tale ga o Valentina ni yaga vakalevu vua nona dau vakavakarau qai tiko ena soqoni, vuli vakataki koya kei na sokalou vakavuvale. E kaya: “Au dau saga meu vulica na ka vou ena gauna kece ni soqoni, qai saga meu muria.” E kaya ni vakacegui koya tale ga nona dau masu, “Au vakavinavinakataka nona vukei au o Jiova.”

Ena yaga tale ga vei keda na ka e vulica o Valentina, e kaya: “Meda kua ni rerevaka e dua na ka. Meda vaqaqacotaka tiko ga noda vakabauta, qai nanuma dei na Maciu 6:33 kei na 2 Korinica 1:3, 4.”

Eda raica na dina ni Same 64:10 vei ira na mataveitacini e Rusia, wili kina o Valentina kei Vladimir, e kaya: “Ena marautaki Jiova vakalevu na yalododonu qai vakaruru vua, era na reki o ira kece e dodonu na lomadra.”