Ena ika22 ni Epereli 2021, e vakataulewataka na Sychyovskiy District Court of the Smolensk Region mai Rusia, ni cala o Sister Nataliya Sorokina kei Sister Mariya Troshina. Rau sa vakatatabutaki tale ga me ono na yabaki.

Nataliya Sorokina

• Sucu: 1975 (Dresden, Jamani)

• Me baleti koya: E nasi qai vakaitikotiko i Jamani. E mani toki i Saint Petersburg, oti e toki sara i Sychyovka ena yasayasa o Smolensk. Dau taleitaka na cakacakaniliga, e vulica tale ga na duidui vosa me vunau kina vei ira e levu. Vulica sara na iVolatabu kei ira na iVakadinadina i Jiova. E qoroya vakalevu nona vulica na veikabuli, kei na inuinui totoka e se bera mai. Qori e uqeti koya me qaravi Jiova, e papitaiso sara ena Okosita 1994

Mariya Troshina

• Sucu: 1977 (Saint Petersburg)

• Me baleti koya: Ni se gone e dau taleitaka na itukutuku makawa. E dau veivakasarasarataki. Taleitaka me vulica na vosa vou me vunau kina vei ira e levu

  Tekivu vulica na iVolatabu kei ira na iVakadinadina i Jiova. Qoroya na ka e vulica ena iVolatabu ni donu na veika e tukuni kina me baleta na itukutuku makawa, kei na veika vakasaenisi. Ena Julai 1991, e yalataka nona bula vua na Kalou o Jiova. Sa takali o tinana a vulica tale ga na iVolatabu qai papitaiso

Ena ika7 ni Okotova 2018, era curuma vakaukaua na vakailesilesi ni Federal Security Service (FSB), kei ira na ovisa e va na vale e Sychyovka. Era taura na ka era taukena e 17 na tacida tagane, yalewa kei ira na gone. Rau vesu o Sister Nataliya Sorokina kei Sister Mariya, qai vesu tu vakawawa.

Na ka e yaco qori e kaya o Mariya ni vukei koya vakalevu me dei tu ga nona dau wilika na kedra itukutuku eso tale na tacida era vesu ena vuku ni nodra vakabauta. E kaya: “Na siga era mai vaqaqara kina ra qai vesuki au, au vakila tu ga na lomavakacegu. E rawa ga qori ena veivuke ni yalo tabu i Jiova.”

Oti e rua na siga ni vaqaqara, e vakarota na mataveilewai na Leninskiy District Court ena siti o Smolensk me rau vesu tu vakawawa me 191 na siga. E sivia e ono na vula, nodrau vakatabui tu me rau kua ni biuta nodrau vale.

Rau kaya na tacida yalewa qo ni rau vosota ga na veivakacacani qo ena vuku ni nodrau veiwekani voleka kei Jiova. E kaya o Nataliya ni bibi meda raica na ka mai na rai i Jiova. E kaya nida sotava na veivakacacani, e bibi meda nanuma tiko o cei e vakavuna. E kaya: “O Setani ga e vakavuna tiko nodra vakacacani na tamata ni Kalou. Ia eda rawa ni yalodina tiko ga vei Jiova.”

E tomana o Mariya: “Na veika eda cakava e veisiga e vakavolekati keda vei Jiova. E bibi gona meda kila tiko na duidui sala e vukei keda, qai kauaitaki keda kina o Jiova e veisiga. Dau nuitaki Jiova ena ka kece. Bucina mo taleitaka mo wilika na iVolatabu e veisiga, saga mo vakasamataka na ka e yaco ena gauna vakaivolatabu, qai katona nomu tikinivolatabu taleitaki.”

Na nodrau vakabauta kei na nodrau vosota na tacida yalewa qo, e ivakaraitaki vinaka vei keda kece. Rau “nuitaki Jiova” tiko ga me ‘vukei rau qai nodrau isasabai.’—Same 115:11.