Ena vakarau tauca na mataveilewai e Birobidzhan District Court of the Jewish Autonomous Region mai Rusia, na lewa me baleti Sister Anna Lokhvitskaya. a E se bera ni kerea na dauveibeitaki na itotogi me tau vua.

Anna Lokhvitskaya

• Sucu: 1993 (Birobidzhan)

• Me baleti koya: Susugi koya o tinana, vakavulici koya tale ga ena ivakavuvuli vakaivolatabu. Papitaiso ena 2012. E dauculacula, rau vakamau kei Artur ena 2018. Rau taleitaka na siwa, gade, kei na qito volleyball

Ena ika6 ni Feperueri 2020, a beitaki o Anna kei na vica tale na tacida yalewa vei ira na vakailesilesi e Rusia. Ratou beitaki ni cala nodratou vakaitavi ena cakacaka e vakavuna na tiko yavavala. E le 19 kece na tacida era beitaki nira daubasulawa, wili kina na o Artur wati Ana, kei na nona nei o Irina.

Na veika e yaco qo e dredre sara ga me rau cakava e levu na ka o rau na veiwatini. Sega ni rawa ni rau gade, sogo nodrau akaude ni baqe, e yalani tale ga na veiqaravi e caka vei rau. E vakavuna me lomaocaoca vakalevu o Anna, e vinakati gona vua ena so na gauna me laurai vakavuniwai.

Ia e kaya ni levu sara na ka e vukei koya: “Dua na ka e vukei au noqu dau rogoca na sere ni broadcast. E vakacegui au, e vukei au tale ga me donu tiko noqu rai. Na vakaukauayago tale ga e vukei au meu bulabula, qai vakasamataka na veika vinaka.”

Kena ikuri e kaya o Anna ni rau dau saga vakaveiwatini me rau vakaliuca na ka era vinakata eso tale. E kaya: “Neirau isausau e veivula me keirau soli iloloma vei ira na tacida, ke mani lailai mada ga. Keirau saga me keirau kua ni kauaitaka vakalevu na leqa keirau sotava, ia me keirau kauaitaki ira ga eso tale.”

Ni waraka tiko nona veilewai, e kaya o Anna ni qo e dua na ‘gauna vinaka me vakaraitaka kina vei Jiova nona yalodina ena ka e cakava.’—Same 18:25.