Ena ika17 ni Tiseba 2020, * e tauca na lewa na mataveilewai na Leninskiy District Court of Rostov-on-Don e Rusia, ni cala o Brother Ruslan Alyev. Ratou kerea na dauveibeitaki ina mataveilewai me tolu na yabaki e valeniveivesu o Ruslan.

Ruslan Alyev

• Sucu: 1987 (Chunoyar, Krasnoyarsk Territory)

• Kena itukutuku: Ratou veitokiyaki nona vuvale qai vakaitikotiko e Azerbaijan kei Ukraine. E dau tara vale, daunivakasala ena ka ni bisinisi, e veivakavulici ena qiri qita, e veivakavulici tale ga ena vosa vakaValagi kei na vosa vakaJaina. Taleitaka na qito, vola serekali, kei na ivakatagi. E vosataka e va na vosa, e vosa tale ga vakaJaina na watina o Kristina

  Ni yabaki 13 sa wilika qai vulica na iVolatabu. Na levu ga ni nona vulica e vakadeitaka kina ni tu ena iVolatabu na isau ni nona taro kece me baleta na bula. E uqeti koya qori me yalataka nona bula qai papitaiso sara ena 2006

Ena ika6 ni June 2019, e beitaki ni basulawa o Brother Ruslan Alyev qai vesu ena ika10 ni June 2019. Oti nona vesu tu me 24 na aua, rau mani totogitaki kei Brother Semyon Baybak me rau kua ni biuta nodrau vale. A dodonu me walu na macawa nona vesu e vale o Ruslan, ia e tosoi vakaciwa qori. E vakavuna me 18 na vula nona vakatabui tu me kua ni biuta nona vale. E sega ni vakadonui me veimaliwai kei ira eso tale vaka vo ga na nona loya, na dauveivaqaqai, na ovisa, kei watina. E vakatabui tale ga me vakayagataka na internet, me taura se vakauta na ivola, imeli, se vakauitukutuku ena talevoni.

Ni bera ni vesu o Ruslan e kaya ni rau dau veitalanoataka kei Kristina na veivakararawataki va qo. Rau kila tale ga ni rawa ni rau na sotava ena gauna qo se na gauna se bera mai. E kaya: “Keirau saga me dei tiko ga neirau tuvatuva vakayalo. Keirau kila na ka e rawa ni yaco ni keirau wilika na veivakararawataki va qori ena iVolaniyabaki kei na kedra italanoa eso na tacida. Era saga mera marau tiko ga qai sega ni vakayalolailaitaki ira na ituvaki dredre era sotava.” E kuria o Ruslan: “Keirau kerei Jiova me vakayaloqaqataki keirau me rawa ni keirau vosota na ituvaki cava ga.”

E vukei Ruslan tale ga nona dau talanoataka vei ira eso tale na veivakararawataki ena rawa ni sotava. E kaya: “Au dau wilika e levu na tikinivolatabu e veivakacegui kei na ulutaga e veiuqeti me rawa niu lomavakacegu, meu vukei ira tale ga e levu na tacida ena ivavakoso. Niu yalolailai e dau vakacegui au na tikinivolatabu kei na ulutaga au dau wilika qai vakasamataka vakatitobu.”

E yaga vakalevu vei Ruslan kei Kristina na nodrau vakarautaki rau ni bera na veivakararawataki. Gauna era vaqaqara tiko kina na ovisa ena nodrau vale, e kaya o Ruslan: “Au lomavakacegu, au sega tale ga niu nuiqawaqawa.” Ni caka tale ga na veivaqaqai e vakasaurarataki Ruslan na dauveivaqaqai me kaya ni cala tale ga o Kristina. E kaya o Ruslan: “E sega ni bau rere o watiqu ke beitaki mada ga vakailasu. Qori e uqeti au vakalevu, e vakayaloqaqataki au tale ga.”

Levu na ka dredre rau sotava ni vakatabui me biuta nona vale o Ruslan. Ia e kaya: “E solia vei keirau o Jiova na ka me keirau bula kina, me keirau volekati koya qai lomavakacegu tale ga. Qori ga na ka au vinakata. Keirau dau nuitaki Jiova ena veigauna sa oti, keirau bula rawarawa tale ga, e vukei keirau qori me keirau kua ni nuiqawaqawa vakalevu.”

Era sega ni vakadonui na tacida mera gole ina vanua ni veilewai ena gauna e veilewaitaki kina o Ruslan. Era mani tu ga i tuba ra qai vakasausau ni gole mai o Ruslan ra qai kailavaka: “Ruslan, keimami na tokoni iko!”

Eda vakavinavinakataka nodra ivakaraitaki ni yalodina na tacida e Rusia. Dina nira beitaki vakailasu, ia ra yalodina tiko ga qai nuitaki Jiova vakatabakidua.—Same 118:6-9.