Ena ika30 ni Julai 2021, e vakataulewataka na Birobidzhan District Court of the Jewish Autonomous Region mai Rusia, ni cala o Sister Nataliya Kriger. E vakatatabutaki me rua veimama na yabaki, ia ena sega ni biu e valeniveivesu ena gauna qo.

Nataliya Kriger

• Sucu: 1978 (Khabarovsk)

• Me baleti koya: Takali o tinana ni se gonedramidrami. Susu ena nodra itikotiko na gone luveniyali. Ni yabaki ono e toki i Amurzet e Rusia, rauta ni 400 na kilomita na kena yawa. E lai tiko e kea kei na so na wekana era iVakadinadina i Jiova. E dau qaravi ira na itabaqase

• Papitaiso me iVakadinadina i Jiova ena 1999. Vakamau kei Valeriy ena 2017. Rau dau taleitaka na danisi, vodo waqa kei na taubale e ulunivanua

Ena Me 2018, era curuma vakaukaua na vakailesilesi na nodrau vale vakaveiwatini. A caka tale ga qori ena levu nodra vale na iVakadinadina i Jiova. Oti era vaqaqai Valeriy na vakailesilesi. Ena ika6 ni Feperueri 2020, a vaqaqai tale ga o Nataliya, e dua vei ira na ono na tacida yalewa era beitaki ena siga ya.

E lolositaka tale o Nataliya nona mai takali nona bubu ena Feperueri 2020. E ono na yabaki nona qaravi koya tu mai.

Ia na dei ni nona veiwekani kei Jiova e vukei koya me vosota na ituvaki dredre kece qo. E kaya: “Noqu dau masulaki ira eso tale, au sega kina ni vakasamataka vakalevu na ituvaki dredre au sotava tiko. Au vakila ni volekati au vakalevu o Jiova, e dei tale ga noqu veiwekani kei koya. E sauma na noqu masu qai tokoni au.”

E dau vakasamataka o Nataliya na sala e tokoni koya tiko ga kina o Jiova. E kaya: “Dau vakayaloqaqataki au na Same 94:19, e kaya: ‘Oni vakacegui au qai vakayaloqaqataki au.’ E levu tu na ivakaraitaki ena gauna makawa kei na gauna qo ena nodra vosota na veivakatovolei na dauveiqaravi i Jiova. E vakaukauataki au noqu dau vakasamataka vakatitobu na ivakaraitaki kece qori.”