Ena ika29 ni Janueri 2021, a ena tauca na mataveilewai ni yasana na Birobidzhan District Courtry of the Jewish Autonomous Region e Rusia, na lewa me baleti sister Yelena Reyno-Chernyshova. Ratou se bera ni kerea na dauveibeitaki na itotogi me tau vua.

Yelena Reyno-Chernyshova

• Sucu: 1968 (Maloy, e Irkutsk)

• Kena italanoa: Ena veiyabaki ni 1990, a vulica na iVolatabu kei ira na iVakadinadina i Jiova. Qori e uqeti koya me cegu mai na mataivalu, qai vakavinakataka nona bula vakawati. Papitaiso ena 1998

• E sega ni iVakadinadina i Jiova o watina, ia e dau tokoni koya ena nona qaravi Jiova. E taleitaka na qito soka, kei na volleyball

Ena ika29 ni Seviteba 2019, e beitaki vei ira na vakailesilesi o sister Yelena Reyno-Chernyshova ni daubasulawa.

Era vaqaqara na vakailesilesi ena nona vale. E vakavinavinakataki Jiova ni solia vua na lomavakacegu. E kaya: “Au kerei Jiova me solia vei au na lomavakacegu kei na yaloqaqa, me rawa niu lewai au vinaka qai yalodina tikoga. Era vaqaqara vakamalua na vakailesilesi, era veidokai talega.”

E vakaleqai sister Yelena kei na nona vuvale na veilewai qo. Ena Julai 2020, e mateniuto o watina. E vakatabui o Yelena me kua ni biuta na vanua o Birobidzhan. E sogo tale ga nona akaude ni baqe.

E vukei Yelena vakalevu nona dau vakasamataka nodra ivakaraitaki na tacida era yalodina tu ga nira vakararawataki. E kaya: “Au taleitaka meu wilika na kedra italanoa na tacida e curumi vakaukaua nodra vale, ra qai vakacacani ena vuku ni nodra vakabauti Jiova. Era sotava e levu na ituvaki dredre, ra qai vakacacani. Ia era yaloqaqa ni vosota tiko ga.” E yaga talega vua nona dau wili iVolatabu e veisiga, qai vakasama vakatitobu.

E yalodina tu ga o Yelena, qai taleitaka me vakananuma vakatitobu na Aisea 30:15: “Oni na kaukaua ke oni tiko vakacegu, oni vakanuinui tiko.” E kaya: “Au na sega vakadua ni guilecava na tikinivolatabu qo. Dua na ka noqu vakavinavinakataki Jiova ni vagolei au mai meu qaravi koya! . . . Au vakila tu ga na lomavakacegu. Au nuitaki [Jiova] vakalevu, au vakararavitaka tale ga vua na ka kece. Au kila ni na sega vakadua ni biuti au.”