Ena Tusiti na ika7 ni Me, 2019, e rogoci ena Oryol Regional Court na kisi me baleta nona totogitaki me ono na yabaki o Dennis Christensen ena vuku ni nona vakabauta. Ia na mataveilewai qori e vakatotomuri ira sara tiko ga na vo ni mataveilewai e Rusia, nira sega ni via rogoca na ivakadinadina matata era vakarautaka na loya i Dennis ni sega ni dina na ka e beitaki kina. Eratou na rairai vakatauca nodratou lewa na tolu na turaganilewa ena muanimacawa.

Ena imatai ni siga ni veilewai era mai tokoni Dennis na mataveitacini. Era tiko tale ga na mata mai na veivanua eso, dauvolaitukutuku, kei ira na dau tokona na dodonu yadua ni lewenivanua. E tekivu rogoci na kisi ena dua na rumu lailai era rawa ni dabe ga kina e rauta ni le 20 ina 25, ra mani vakasukai e rauta ni le 50. Ia e vakadonuya na mataveilewai na nodratou kerekere na loya i Dennis me tokitaki na veilewai ena dua na rumu levu me rauti ira na le 80. E mani rube na kisi ni oti ga e tolu na aua.

Ena ikarua ni siga ni veilewai, ratou sega ni duavata na turaganilewa ina nodratou kerekere na loya i Dennis me dikevi tale e levu na ivakadinadina e tokona ni sega ni cala. E rarawataki dina qo, ni ratou nanuma na loya i Dennis ni ivakadinadina sara ga qori ena vakavotui kina ni cala nona totogitaki. Ni cava na siga qori e vakarota na mataveilewai ni na rogoci tale na kisi ena Lotulevu na ika 16 ni Me, me iotioti tale ga kina ni nodra vakamacala na dauveibeitaki, kei ira na loya i Dennis.

Meda masulaki ira tiko ga na tacida e Rusia mera marau, ra qai dei ena nodra vakabauta na yalayala i Jiova ni na yavala me vakabulai ira mai vei ira na dauveibeci.—Same 12:5.