Ena ika21 ni Okotova, 2020, * ena tauca na Mataveilewai ni Yasana o Pervomayskiy ena Siti o Omsk, na lewa me baleti ratou o Brother Sergey Polyakov kei watina o Sister Anastasia, o Sister Gaukhar Bektemirova kei Sister Dinara Dyusekeyeva. Ratou vinakata na dauveibeitaki me vesu o Brother Polyakov me ono veimama na yabaki e valeniveivesu. Ratou na rawa ni vakatatabutaki tu na tolu na tacida yalewa me rua na yabaki.

Sergey Polyakov

• Sucu: 1972 (Yasayasa o Murmansk)

• Kena italanoa: Vuli ena univesiti, qai kenadau ena biaulivaliva (radiophysicist). Vakamautaki Anastasia ena 2003

Anastasia Polyakova

• Sucu: 1984 (Yasayasa o Murmansk)

• Kena italanoa: Vuli loya ena univesiti. Rau taleitaka vakaveiwatini me rau vulica eso tale na vosa, me vaka na vosa vakaJaina, vosa vaKazakhstan, vosa vagalu ni Rusia kei na vosa vakaSerbia

Gaukhar Bektemirova

• Sucu: 1976 (Uryl, e Kazakhstan)

• Kena italanoa: Gone duadua vei ratou na le ono na veitacini. Susu ena veiulunivanua e Kazakhstan qai dau taleitaka na veika bula. Vica vata na yabaki nona vaqaqa tu na inaki ni bula. Sa qai vakacegui koya na veika dina e vulica ena iVolatabu. Nona vulica vagumatua na Vosa ni Kalou e vakayaloqaqataki koya, e vakacegui koya tale ga me vosota nona vesu vakatawadodonu

Dinara Dyusekeyeva

• Sucu: 1982 (Leningradskoye, e Kazakhstan)

• Kena italanoa: Dau vakasamataka vakatitobu na inaki ni bula ni se goneyalewa. Tekivu vulica na iVolatabu ni yabaki 17. E taleitaka vakalevu na veika e vulica ena iVolatabu, marautaka tale ga nona kila ni yaca ni Kalou o Jiova. E taleitaka na qito basketball, volleyball, cici, kei na vodo basikeli

Ena ika4 ni Julai, 2018, era curuma vakaukaua ena bogi na ovisa na nodrau vale o Brother Polyakov kei watina o Anastasia ena gauna rau se moce tu kina. Era mokulaki Brother Polyakov na ovisa era vakamatavulo tu. Rau vesu vakaveiwatini, rau qai wawa veilewai tu e valeniveivesu. Rau imatai ni veiwatini me rau vesu ena 2017, ni oti nona tauca na Mataveilewai Cecere ni sa vakatabui nodra cakacaka na iVakadinadina i Jiova e Rusia. E lima na vula nodrau dui vesu tu, rau sega ni veirai. Oti qori rau qai vesu vata e vale me tolu na vula.

Ena Me 2019, era curuma vakailoa na vakailesilesi na nodra vale na iVakadinadina i Jiova ena Yasayasa o Omsk. Rau vesu kina o Sister Bektemirova kei Sister Dyusekeyeva. E qai rogoci vata nodrau kisi kei rau o Brother Polyakov kei na watina. E tekivu nodratou veilewai ena imatai ni Epereli, 2020.

Eda nuidei ni o Jiova ena vakaukauataki ira nona dauveiqaravi mera vosota kina na veika tawadodonu e caka vei ira.—Efeso 3:20.