Ena ika10 ni Feperueri 2021, e sega ni vakadonuya na mataveilewai na Kursk Regional Court e Rusia, nona kerekere o brother Dennis Christensen me sereki. E kerea me qai sauma vakailavo na vo ni gauna me vesu kina. Sa sivia qo e dua na yabaki nona rawa ni sereki o Dennis, ia e sega ni vakadonui qori.

A volavola o Dennis vei watina o Irina, qai kaya vua e dua nona tikinivolatabu e dau taleitaka: “Meda kua gona ni soro ena caka vinaka, nida na tamusuka ena kena gauna ke da sega ni vakacauoca.” (Kalatia 6:9) E vakadeitaka o Dennis ni o Jiova ena vakalougatataki rau ke rau yalodina tiko ga, dauveivukei qai kua ni soro. E kaya ni gauna me sereki kina, e vinakata me qaqaco cake sara nona vakabauta ni vakatauvatani kei na gauna se qai vesu kina.

Tekivu vesu o Dennis ena Me 2017, rau sega gona ni tu vata vakaveiwatini me voleka ni va na yabaki. Rau ivakaraitaki vinaka vei keda o Dennis kei Irina ena nodrau nuitaki Jiova, rau lomavakacegu, kei na nodrau sasaga vagumatua me rau yalodina tiko ga.—Filipai 1:14.