Ena ika 28 ni Okotova 2020, e kaya na Bryansk Regional Court mai Rusia, ni ratou cala o Vladimir, Eduard, Tatyana, kei Olga. A vakataulewataki me ratou biu e valeniveivesu me dua na yabaki qai tolu na vula. Ia me vaka ni ratou sa vesu tu ni bera ni rogoci nodratou kisi, e sega ni vinakati gona me ratou curu tale e valeniveivesu. E vakataulewataka ga na mataveilewai ni ratou na beitaki tiko ga me ratou daubasulawa. Ia ratou marautaka na tacida na galala e soli vei ratou. E sega ni vakarautaki e dua na lawa me kerea na dauveibeitaki me tau eso tale na kedratou itotogi.

Ni bera ni vakataulewa na mataveilewai, rau vesu tu vakawawa o Brother Vladimir Khokhlov kei Brother Eduard Zhinzhikov me 316 na siga. O Sister Tatyana Shamsheva kei Sistere Olga Silaeva rau vesu me 245 na siga. Ni ratou sere, rau vakatarogi sara o rau na tacida yalewa qori ena iKalima ni Rogo Mai na iLawalawa Dauvakatulewa 2020. Rau kaya ni vukei rau vakalevu me rau vosota ena marau, ya na nodrau masu, wili iVolatabu kei na nodrau vakavinavinakataka na ka e cakava vei rau o Jiova.