Ena ika25 ni Janueri, 2021, e sega ni vakadonuya na mataveilewai na Supreme Court Kabardino-Balkarian Republic e Rusia, nodratou kerekere na loya dauveibeitaki. Ratou kerea me veisautaki na lewa e tau ena ika7 ni Okotova 2020, e tukuni kina ni sega ni cala o Brother Yuriy Zalipayev. Ratou rawa ni kerea na dauveibeitaki me rogoci tale na kisi. Ia ena gauna qo, sa talaci na nona kisi. E rawa tale ga ni kerea o Yuriy me saumi vakailavo baleta ni beitaki vakailasu.

E kila o Yuriy ni rawa ni veisau na lewa e tau me baleti koya, ia e yaloqaqa qai nuitaki Jiova tu ga. Ni vakarau oti nona veilewai, e doudou ni tukuna na sala ena vakaotia kina na Kalou na veika ca kece, okati kina na nodra vakararawataki na iVakadinadina i Jiova e Rusia. E kaya: “Se mani vakacava na nodra sasaga na dauveivakacacani, ena sega ni dua na ka ena vakaleqa na noqu vakabauta na yalayala ni Kalou ni na vakaotia na veika ca kece e vuravura. Au vakabauta tale ga ni sa voleka na gauna mera na veiyaloni na duikaikai me vaka ga e dua na mataveitacini. Ena sega ni dua na ka ena vakaleqa na nodra duavata. E kaya na iVolatabu me baleta na Kalou: ‘Ena vakataulewataki ira na veimatanitu o koya ena vakadodonutaka e levu na lewe ni veivanua. Era na tukitukia na nodra iseleiwau me batinisiviyara kei na nodra moto me isele ni sasamaki. Ena sega ni lave iseleiwau e dua na matanitu ina dua na matanitu era na sega ni vulica tale na ivalu.’—Aisea 2:4.

“Au nuidei ni sa vakarau yaco na yalayala qo!”