Ena Lotulevu na ika14 ni Noveba 2019, e beitaki Brother Aleksey Metsger na Mataveilewai e Perm ni cala, e totogitaki tale ga me sauma e rauta ni $5,460 na ilavo ni Merika. O Brother Aleksey sa ika12 ni tacida tagane e beitaki ena yabaki qo ni vakavuna na tiko yavavala, ni vunautaka na ka e vakabauta kei na nona qaravi Kalou. Ena kerea nona loya o Brother Metsger me rogoci tale na kisi qori.

Ena ika25 ni Epereli 2019, e beitaki o Brother Metsger ena basulawa ni kaya ni dua na iVakadinadina i Jiova. E kilai qori ena so na katokatoni e rogoci kina ni veitalanoa tiko kei ira na so tale me baleta na lotu. E caka lo na katokatoni qori.

E tekivu na veilewai ena ika14 ni Okotova 2019. E kaya na dauveibeitaki me bala e valeniveivesu o Brother Metsger me tolu na yabaki. E sega ni kaya na mataveilewai me vesu o Brother Metsger, ia se beitaki tiko ga ni cala. Eda kauai vakalevu ena tikina qori, ni na rawa tale ga ni cakava qori na mataveilewai vei ira e levu tale na tacida.

Eda kila ni o Jiova ena vakacegui ira tiko ga na tacida e Rusia, ena vakayaloqaqataki ira tale ga nira sotava tiko na veivakacacani tawadodonu vei ira na veiliutaki.—Same 119:76, 161.