Ena ika19 ni Julai 2023, e sere o Brother Yuriy Savelyev mai na valeniveivesu ena siti o Rubtsovsk mai Rusia. E vesu ena imatai ni gauna ena ika9 ni Noveba 2018, qai tu e valeniveivesu me sivia ni va veimama na yabaki.

E sega ni savasava na vanua e vesu tu kina qai vakavuna nona tautauvimate. Eso tale ga na gauna, e dau beitaki vakailasu qai biu ena nodra rumu na daubasulawa rerevaki. Ia e donu tu ga na nona rai ni dau vakaukauataki koya na nona dau masu. E dau yalololoma o Yuriy qai vakaitovotaka na itovo vaKarisito, era dokai koya kina na ovisa kei ira na vo ni kaivesu.

E vosa o Yuriy ina mataveilewai ni bera ni tau na kena itotogi. E cavuta na ka e tukuna o Jisu ena Maciu 22:37: “Mo lomani Jiova na nomu Kalou ena lomamu taucoko, ena nomu vinaka taucoko, kei na nomu vakasama taucoko.” E ivakaraitaki vinaka dina o Yuriy ni muria na ka e tukuni ena tikinivolatabu qori qai saga me yalodina tiko ga. Eda nuidei ni na vakalougatataki koya tiko ga o Jiova ena vuku ni nona vakabauta, loloma kei na vosota.