Ena imatai ni Maji, 2024 e sere mai o Brother Oleg Danilov ni oti e tolu na yabaki nona vesu tu ena valeniveivesu e Rusia.

Ni bera ni tau na kena itotogi, qo na ka e kaya o Oleg ni na cakava ke mani vesu: “Au dau vakasamataka vakatitobu na ka e tukuna o Paula ena Filipai 4:4: ‘Moni marau tiko ga ena vuku ni Turaga. Au kaya tale moni marau!’ A vola o Paula na vosa qori ena gauna a vesu tu kina. E dei na nona veiwekani kei Jiova kei na nona nuitaki koya, qori e vakavuna me marau tu ga ni vesu. Au via cakava tale ga qori qai kua ni vakalaiva e dua na ka me kauta laivi noqu marau.”

Na nona saga me marau tiko ga o Oleg e vakatovolei ena gauna e vesu kina kei na nona tu veiyawaki kei ratou nona vuvale. E gauna dredre sara ga vua nona sega ni tiko ena vakamau nei luvena tagane ulumatua. Ia kila na cava a qai vukei koya? Qo na ka e kaya o Sister Nataliya Danilova na watina: “E vakasamataka o Oleg ke kauaitaka tiko ga na ka e vakayalia, ena rawa ni vakaluluqataka nona vakabauta qai kauta laivi nona marau. Ia e vakasamataka tiko ga na nona veiwekani kei Jiova, na veivuke ni yalo tabu, nona vuvale lomani, itokani voleka kei na mataveitacini e vuravura raraba. Ni va qori nona rai, e vaka ga e dua na turaga vutuniyau, e marau vakalevu.”

E kaya tale ga o Nataliya na sala e yaga kina vei rau na luvedrau na nona ivakaraitaki o Oleg: “Nodrau raica na ka e sotava o tamadrau kei na sala e tokoni keitou kina o Jiova, e vaqaqacotaka dina nodrau nuitaki Jiova, kei na nodrau lomani ira na mataveitacini. Rau vakadeitaka ni rau na vakaliuca tiko ga nodrau qaravi Jiova.”

Eda marau ni sa sotavi ratou tale nona vuvale o Oleg. Eda vulica tale ga ena nona ivakaraitaki ke mani vakatovolei na noda vakabauta, eda rawa ni marau tiko ga qai nuidei ni na vukei keda na yalo tabu i Jiova.​—⁠1 Pita 4:⁠14.