Ena ika9 ni Feperueri 2024, a sere o Brother Vilen Avanesov e yabaki 71, ni voleka ni lima na yabaki nona vesu tu ena valeniveivesu e Rusia. Ena Me 2019, a kau qai lai vesu. Ena ika29 ni Julai, a totogitaki me vesu me ono na yabaki. E tiko ga e valeniveivesu o Vilen ena gauna a vesu tu kina, sa sega gona ni vinakati me vakacavara na kena itotogi. A vesu vata tale ga kei koya na luvena tagane o Arsen, ia e se sega ni sere mai.

Ni oti e vica na siga nona sere o Vilen, e kaya na watina o Sister Stella Avanesova: “Dua na gauna dredre sara ga vei keitou na imatai ni rua veimama na yabaki nona vesu me wawa veilewai o Vilen. Au nuiqawaqawa vakalevu. E vakatabui me keitou vosa vua, se veivolavolai mada ga. Kuria ya, ni rau vesu ruarua o watiqu kei luvequ, au sega gona ni kila meu na kauta mai vei na ilavo me keitou bula kina vakavuvale.”

E dredre na ituvaki rau sotava o Vilen kei Stella ia rau vakila ni tokoni rau tu ga o Jiova. E kaya o Stella: “E tukuna vei au o watiqu na gauna kece e kau kina ina mataveilewai, e dau raici ira na mataveitacini nira tu e kea. Nona raica ya, e vakadeitaka kina ni kauaitaki koya o Jiova. Ia vei au, e raica o Jiova me tiko na ka au gadreva. Au nuidei kina ni o Jiova ena tokoni ira tu ga na nuitaki koya.”

Eda marau ni rau sa mai sota tale o Vilen kei Stella. Eda na masulaki luvedrau tiko ga o Arsen, kei ira kece na tacida era vesu tiko ena gauna qo. Eda nuidei ni o Jiova ena vu ni rarama tiko ga, ivakabula qai bai kaukaua vei ira na yalodina vua.​—Same 27:1.