Ena ika14 ni June 2024, rau sere mai o Brother Denis Antonov kei Brother Aleksandr Korolev ena dua na valeniveivesu ena koro o Molochnitsa, e Rusia. Ena ika25 ni Okosita 2022, rau beitaki ni rau cala qai vesu me rua na yabaki. Qo rau sa vakacavara na nodrau itotogi, baleta ni rau sa vesu tu mai ni bera ni rau beitaki.

Qo na ka e kaya o Olga na wati Denis ena ka e vukei rau vakaveiwatini ni rau tu veiyawaki. E kaya: “Ni keirau veivolavolai keirau na veivakayaloqaqataki ena so na tikinivolatabu. Kena ivakaraitaki, e vukei keirau vakalevu na ka e vola o Solomoni ena Dauvunau 8:12: ‘Au kila ni na vinaka sara nodra bula o ira era doka na Kalou dina.’ Keirau vakadeitaka kina kevaka keirau qaravi Jiova tiko ga qai sega ni soro, ena vukei keirau me keirau vosota.”

Ni bera ni vesu o Aleksandr qo na ka e cavuta ena iotioti ni nona vosa ena mataveilewai, qai vakatauvatana na kena ituvaki kei na ka e sotava na parofita o Taniela. E kaya: “Au kila niu tu ena dua na ituvaki au rawa ni vakamatei, ia na nona vakaraitaki ni vakabauta o Taniela e uqeti au meu masuta tiko ga na Kalou o Jiova. Au na kerea tiko ga vua me solia vei au na vakabauta vata qori, ni na sega ni tarova rawa qori na veivakacacani.”

Eda marau ni rau sa sotavi ira tale na nodrau vuvale o Denis kei Aleksandr. Na nodrau ivakaraitaki e vakadeitaka vei keda na ka e yalataka na Same 4:3: “Moni kila ni o Jiova ena mareqeti koya e yalodina vua, ena rogo mai o Jiova [nida] kaci yani vua.”