Ena ika11 ni June 2024, e sere mai o Sister Olga Ivanova ena dua na valeniveivesu ena siti o Zelenokumsk, e Rusia. Ena ika25 ni Okotova 2021, e beitaki ni cala qai vesu me tolu veimama na yabaki. Ni bera nona vesu a vakatatabutaki e vale me sivia ni dua na yabaki va na vula, qo sa vakacavara na kena itotogi. A beitaki ni rau daubasulawa kei watina. E totogitaki me walu na yabaki o Yevgeniy, e se vesu tiko ena gauna qo.

Gauna e vesu tu kina o Olga era vakacakacakataki koya vakaukaua na vakailesilesi ni valeniveivesu me 12 na aua ena dua na siga, ena ono na siga e veimacawa. E tokitaki tale ga vakalevu ena duidui valeniveivesu e Rusia. Qori e vakadredretaka vei Svetlana na tinai Olga sa yada, me sikovi koya qai vakayaloqaqataki koya. Ia e nuidei o Svetlana ni vukei Olga tu ga o Jiova, e kaya: “Gauna kece e tokitaki kina o Olga ina dua tale na valeniveivesu, era dau kauaitaki koya na mataveitacini ena yasayasa ya. Era na duri tu me vica vata na aua mera solia na kena kakana kei na so tale nona iyaya, era na saga tale ga mera sikovi koya ena gauna veiganiti. Niu gole mada ga meu lai raici koya, era dau vakarautaka na vanua meu tiko kina, ra qai vukei au ena ka au vinakata. E veivakurabuitaki dina!”

Eda vakavinavinakataki Jiova ni kauaitaki Olga vakayalololoma ena gauna e vesu tu kina. Meda nanumi watina tale ga ena masu kei ira kece na tiko e valeniveivesu ena gauna qo, da qai nuidei ni o Jiova ena vakaraitaka tiko ga vei ira na dei ni nona loloma.​—⁠Vakatekivu 39:21.