E vakatulewataka ena ika9 ni Epereli, 2019, na Mataveilewai ena siti e Surgut me rau sere o Brother Yevgeniy Fedin kei Sergey Loginov ni rau waraka toka e valeniveivesu nodrau veilewai. Na vakatulewa qori e sega ni vakadonui kina na ka era vinakata na vakailesilesi e Rusia. Me vaka ni se vaqaqai tiko na nodrau kisi, rau sa sere mai valeniveivesu ena ika11 ni Epereli.

Rau vesu o Brother Fedin kei Loginov ena ika15 ni Feperueri, 2019, ena gauna era curuma kina vakaukaua na vakailesilesi na veivale ena siti o Surgut. Era vesu kina e rauta ni le 19 na tacida nira beitaki ena basulawa. E tolu vei ratou qori o Yevgeniy, Sergey, kei Brother Artur Severinchik, ratou totogitaki me ratou waraka tiko ga e valeniveivesu nodratou veilewai. Ena ika15 ni Maji sa sere o Artur.

Na gauna era vakacaca kina na vakailesilesi ena Feperueri, era vakatotogani ratou na le vitu na tacida wili kina o Brother Loginov. Era rarawataka na veivakatotogani qori na tacida, ra mani kerea na veivuke ni Mataveilewai me baleta nodra dodonu na lewenivanua e Urope (European Court of Human Rights). Se dikevi tiko ena gauna qo na kerekere qori.

Eda nuidei ni na rogoca o Jiova noda masu, qai vakaukauataki ira na tacida yalodina e Rusia.—Same 10:17.