Ena ika2 ni Julai, 2019, e vakatulewataka na mataveilewai e Krasnoyarsk e Rusia, me sere ena nona tu vakavesu e vale o Brother Stupnikov. Sa sere, ia se vaqaqai tiko ga na nona kisi.

Ena ika3 ni Julai 2018, a gole o Stupnikov ina rara ni waqavuka na Krasnoyarsk International Airport me vuka ena matakalailai ni siga ya. Erau tarovi koya e rua na ovisa mai na Federal Security Service, rau mani vesuki koya. E walu na vula nona vesu tu vakawawa ni bera nona veilewai, oti sa qai lai tu vakavesu e vale me yacova na icavacava ni vula o Feperueri 2019.

E kaya o Brother Stupnikov ni levu sara na ka e sa vulica, vaka kina nona veiwekani kei Jiova ena veiyabaki sa sivi. E tukuna tale ga: “Sa vakayabaki neirau iVakadinadina i Jiova tu [o au kei Olga], ia dua na gauna qo keirau sa qai volekati Jiova sara! Ena ituvaki dredre mada ga, au vakila tiko ga nona veitokoni na Tamada me yacova sara mai nikua. E talei dina niu vakila na nona volekati au, kei nona tu vakarau me sauma noqu masu!”

E tinia o Brother Stupnikov ni kaya: “Au sa qai vakadeitaka ga vakalevu ni kila vinaka tu, e kauaitaka tale ga na ivakarau ni lomaqu na Tamaqu. Qori e vukei au meu dau nuitaki koya vakatabakidua, meu kua ni dau lomaocaocataka vakasivia na veitusaqati. E rerevaki dina ke da tinia na veiwekani voleka qori. Au nuidei niu na sega ni leqataka e dua na ka ena nona veitokoni o Jiova.”

Me tekivu ena imatai ni Julai, na levu ni kisi era beitaki kina na tacida e Rusia sa rauta ni 217. Ena vica na kisi qori era sa vakalailaitaka na vakailesilesi e Rusia na vakatatabu vei ira eso na tacida. Ia eda sega ni nuitaki ira na mataveilewai vakatamata se vakailesilesi, eda nuitaki Jiova ga. Eda masuti Jiova me vakaukauataki ira, me taqomaki ira tale ga na tacida e Rusia.—Same 28:7.