Ena ika22 ni Feperueri 2023, e sereki o Brother Andrey Andreyev ni oti nona vesu me tolu na yabaki.

Ena ika16 ni Okotova 2019, e vesu o Andrey kei ira eso tale na tacida ni caka oti na vaqaqara ena nodra vale na mataveitacini ena siti o Kursk. E wawa veilewai tu e valeniveivesu me voleka ni 20 na vula, qai totogitaki ena ika3 ni June 2021.

Dina ga ni vesu tu, ia e saga tiko ga me vaqaqacotaka nona vakabauta o watina o Svetlana, kei rau na luvena yalewa o Anzhelika kei Albina. E dau okata ena nona ivola na tikinivolatabu me na vakaukauataki ratou. E vola mada ga na ivunau ena gauna e vakamau kina o Anzhelika. E kaya o Anzhelika: “E uqeti keimami vakalevu na nona ivunau. Era luluvu qai vakayaloqaqataki ira na sureti, e vaka ga e maliwai keimami tiko ena gauna ni vakamau.”

Ratou dau vodo basi me walu na aua na nona vuvale, me ratou sikovi Andrey. Dina ga ni veivakaocai, e kaya Svetlana nira dau tokoni ratou na mataveitacini. Era vakarautaka na nodratou icili, na kakana kei na lori me kauti ratou i valeniveivesu. Eso mada ga na tacida, era dau lai wawa tu ena bogi taucoko ena vanua era yatuni tu kina na lai veisiko e valeniveivesu. Era cakava qori, me rawa ni ratou sikovi Andrey na lewe ni nona vuvale.

E tautauvimate o Andrey ena vuku ni ituvaki dredre e sotava e valeniveivesu, ia e kaukaua tu ga vakayalo. Era dokai koya na vakailesilesi e valeniveivesu ni vinaka na nona itovo ra qai vakadonuya mera sikovi koya yani e le levu. E kaya o Andrey: “Ena gauna au totogitaki kina, au sega ni cudru se yalocataka e dua. Au rawa ni yalodina ena veivuke i Jiova qai marau tiko ga.”

Eda nuidei ni o Jiova ena vakalougatataka na nona saga o Andrey me vakaraitaka tiko ga na loloma vaKarisito.—1 Joni 4:16.