Ena ika31 ni Tiseba 2020, e sereki mai na valeniveivesu e Rusia o Brother Feliks Makhammadiyev. E vakataulewataka na mataveilewai ni yasana na Belyayevsky District Court, me vesu tu vakawawa me yacova nona vakatalai lesu i Uzbekistan. E caka qori ni sa bokoci me lewenivanua e Rusia ena Epereli, 2020. Ena ika20 ni Janueri 2021, era vakavodoki koya na ovisa ina sitima me lesu i Uzbekistan. E ka ni marau ni yaco bula e Uzbekistan ena ika21 ni Janueri, 2021. Ni yaco yani e waraki koya tu na watina o Yevgeniya.

Rauta ni 18 na yabaki nona vakaitikotiko e Rusia. Ena 2002, rau biubiu kei tinana mai Uzbekistan me rau gole i Saratov, e Rusia. Ena 2004, e papitaiso o Feliks ni se qai yabaki 19. Ena 2011, rau vakamau sara kei Yevgeniya.

Ena ika12 ni June 2018, era curuma vakaukaua nodrau vale vakaveiwatini eso na vakailesilesi na Federal Security Service (FSB), kei na ovisa era vakamatavulo. A kau o Feliks qai voleka ni dua na yabaki nona vesu tu vakawawa. E masu wasoma vei Jiova qori sara ga na ka e vukei koya me dei tiko ga. E kaya: “Au kerei Jiova e veisiga ena masu me solia vei au na vakacegu kei na marau.”

Ena ika19 ni Seviteba 2019, ratou beitaki ni cala qai bala tale ga e valeniveivesu o Feliks kei na lima tale na tacida tagane. Ni sega ni vakadonui nodratou kerekere, ratou mani tokitaki ina valeniveivesu e Orenburg. E sivia e 800 na kilomita na kena yawa mai na nodratou dui vale e Saratov. Gauna ratou yaco yani kina, ratou mokulaki vakaca.

Gauna dredre kece qori e marau qai matadredredre tu ga o Feliks. E kaya na watina o Yevgeniya: “Au qoroi koya vakalevu! E vosota tu ga ena gauna e veilewaitaki kina me yacova nona vesu. E uqeti au sara ga na nona ivakaraitaki.”

Dina nira saga na vakailesilesi e Rusia mera vakamavoataki Feliks, me kua tale ga ni qaravi Jiova. Ia e kaya ni nona vakacacani e vaqaqacotaka nona vakabauti Jiova. Eda lai nanuma kina na Vakatekivu 50:20, nona kaya o Josefa vei ratou na tuakana: “De dou a nakita mo dou vakaleqai au, ia a nona inaki na Kalou me tini vinaka.”