Ena ika30 ni Noveba 2022, e sereki mai valeniveivesu o Brother Sergey Polyakov, ni oti e tolu na yabaki. Me tekivu nona vesu ena ika4 ni Julai 2018, e vosota e levu na sala e totogitaki kina. Okati kina nona vesu duadua tu me va na vula.

Ni vo e 16 na vula me sereki, a vesu tu o Sergey ena dua na valeniveivesu ena siti o Valday. Qori e rauta ni 3,000 na kilomita mai nona vale. E kilai ni dua na kaivesu e kaukaua na nona vakabauta, ra qai dokai koya vakalevu na vakailesilesi kei ira na vo ni kaivesu. E vakayaloqaqataki Sergey vakalevu na nodra dau volavola yani na tacida kei ira na wekana. E dau levu sara na iwiliwili ni ivola e dau ciqoma ena veisiga, ni vakatauvatani kei ira na rauta e 250 na kaivesu.

E sotavi watina o Anastasia ena gauna e sereki mai kina. E vesu duadua tale tu ga o Anastasia me lima na vula. Oti qori e kaya na mataveilewai ni cala, e qai rube tu na nona kisi ena vuku ni nona vakabauta. O rau na Polyakov, e rau imatai ni veiwatini me rau vesu ni oti na kena vakatabuya na Mataveilewai Cecere na noda cakacaka na iVakadinadina i Jiova ena 2017.

Era se vesu tu ga e 100 na tacida e Rusia kei Crimea. Eda nuidei ni o Jiova ena tokoni ira tiko ga na ‘vosota na veivakacacani se na veika tawadodonu ena vuku ni nodra lewaeloma vua na Kalou.’—1 Pita 2:19.