Ena ika26 ni June 2020, e totogitaki vakatawadodonu o Brother Dennis Christensen vei ira na vakailesilesi ni valeniveivesu e Lgov, ni lai biu ena dua tale na rumu era dau vesu ga kina na daubasulawa vakadomobula. Era cakava qori me soro kina ni sa tautauvimate. De dua era na bulia tale eso na ka na loya ni matanitu mera beitaki Brother Christensen kina me kua ni sereki totolo, me vaka sa vakatulewataki oti.

Sa sivia qo e tolu na yabaki nona vesu tu o Brother Christensen. Sa oti qo e rua na yabaki na kena vakatarai vua me kerea me sereki totolo. E cakava qori vakatolu, ia e qai sega ni vakadonui. Ena ikava ni gauna e kerea kina, sa qai kau cake ena mataveilewai. Ena ika23 ni June 2020, e vakatulewataka na Mataveilewai ni Tikina o Lgov me sa totogitaki ga vakailavo me sosomitaka na levu ni yabaki me vesu kina. E tokona na vakatulewa qori o Mr. Artem Kofanov, na loya e rogoca na kisi.

Ni oti e rua na siga, e qai kaya e dua tale na loya o Mr. Aleksei Shatunov, ni cala na vakatulewa ni mataveilewai. E kerea me rogoci tale na kisi ena mataveilewai tiko ga qori, ia me qarava e dua tale na turaganilewa. E yavutaka na nona vakatulewa o Mr. Shatunov ena so na itukutuku era tukuna mai na ovisa ni valeniveivesu e Lgov. Era kaya ni dau “sega ni qarava vinaka na nona cakacaka e valeniveivesu o Dennis, qai ca na nona itovo.”

Ni rogoci na nona kisi ena ika23 ni June, era via tukuna tale na ovisa ni valeniveivesu eso na itukutuku ca me baleti koya, ia e sega ni vakadonuya o turaganilewa. E vakaraitaka na loya nei Brother Christensen ena mataveilewai na kena itukutuku mai valenibula me vakadinadinataka ni sega ni rawa ni cakava o koya na cakacaka kaukaua e valeniveivesu. E qai kaya e dua na ovisa ni valeniveivesu ni sega ni dua na cakacaka e tu ena valeniveivesu me ganita na kena ituvaki o Brother Christensen.

Era saga tiko na loya dauveibeitaki me kua ni sereki totolo o Brother Christensen, ia ena gauna vata qori era vakauta tale ga na ovisa ni valeniveivesu e rua na ripote e beitaki kina o koya. Na kena imatai, e tu ena valenikana ena gauna cala, kei na kena karua ni vakasiqeleti tu ga qai sega ni vaka jakete. Ya na vuna era biuti koya kina na ovisa ni valeniveivesu ena vanua era dau vesu kina na daubasulawa vakadomobula (EPKT )me tini na siga. Ia e tukuni ena lawa ni matanitu o Rusia ni dau caka ga qori vei ira na cala bibi nira beca na lawa ni valeniveivesu, nira laurai oti tale ga vakavuniwai. Ia e sega ni dina qori vei Brother Christensen, ya na vuna e sega ni dua kina na yavu me biu kina ena EPKT.

E vesu tiko o Brother Christensen kei na dua tale na kaivesu ena dua na rumu lailai sara. E sega na kena katuba leka qai dukalevu tale ga. E rivarivabitaki kina na nona bula. E tauvi niumonia ena vica na vula sa oti, e laurai tale ga vua ni leqa sara ga vakaca na nona suitu. E kaya na nona loya nira “kila vinaka tu qori na vakailesilesi ni valeniveivesu, ia ratou qai biuti koya ena rumu e sega ni dakoba na kena loga, e kuria ga na nona tauvimate.”

E kaya o Brother Christensen vei nona loya ni gauna era raici koya kina na ovisa ni valeniveivesu ni beca na lawa, era tiko tale ga vata kei koya eso tale na kaivesu. Ia e qai biu ga o koya ena EPKT. E kaya gona o nona loya, “E laurai ga ena ka e caka qo vei Dennis ni nakicataki me kua kina ni sereki totolo.”

Era bulia na vakailesilesi e Rusia eso tale na sala mera tusaqati ira kina na tacida. Ia eda nuidei ni o Jiova ena nodra ivakaruru tudei. Meda masulaki rau tiko ga o Brother Christensen kei na watina o Irina, me tokoni rau tiko ga o Jiova me rau yalodina vua ena gauna dredre qo.—Same 94:13, 21, 22.