Ena ika27 ni June, 2022, e tauca e dua na vakatulewa bibi vei Rusia na Mataveilewai ni Dodonu ni Lewenivanua e Urope (ECHR) ena nona tusaqati ira tiko na tacida a. E kaya ni cala vakalawa na nona tusaqati ira tiko na tacida me tekivu mai na 2017. E cala tale ga na nona vakatatabutaka na noda ivola, kei na jw.org. E vakaroti o Rusia me bokoca kece na kisi ni veilewai me baleti ira na tacida, qai sereki ira na tu e valeniveivesu. E vakaroti tale ga me vakasuka kece na tabavale, kei na ka kece e vesuka. Ke sega me sauma e $63,684,978 na ilavo ni Merika. E vakaroti tale ga me sauma vei ira na tacida era beitaki e $3,682,445 na ilavo ni Merika.

Na lewa e tau qori e baleta tiko e 20 na kisi ni veilewai e caka mai na 2010 ina 2019, e okati tiko kina e sivia ni 1,400 na tacida kei na noda isoqosoqo vakalawataki. Ia na lewa e tauca qo na ECHR e sega ni okati ga kina na kisi ni veilewai sa tau oti na kena lewa. E tukuna ni dodonu vei Rusia me cakava na ka kece e rawata me tinia na kisi ni veilewai kece era beitaki tiko kina na iVakadinadina i Jiova ena gauna qo . . . me sereki ira tale ga na tacida kece era vesu tu.” (Neitou na matanivola kala) E kilai ena lewa e tau qori ni o ira na tacida era tiko e Rusia kei na so tale na vanua, era dau muria na lawa ni vanua se matanitu era tiko kina. Ia era veilewaitaki tiko vakatawadodonu.

E kaya na ECHR ni sega ni dua na yavu vinaka era beitaki kina na tacida, na noda ivakavuvuli, ivola kei na noda website me vakavuna na tikoyavavala. Raica mada qo eso na kena ivakaraitaki:

• Ka e caka: E vakabibitaka na ECHR ena mataveilewai e Rusia “nira sega ni vakadeitaka rawa tiko na ka era tukuna se cakava na tacida era veilewaitaki, me laurai kina nira vakaraitaka na itovo kaukaua, veicati, se veivakaduiduitaki.” (§271)

• Vakabauta ni lotu dina na iVakadinadina i Jiova: “Na nodra uqeti ira eso tale mera kila na ivakavuvuli dina ra qai biuta na lotu lasu, e sega ni cala vakalawa. Ia era vakaraitaka tiko na galala ni sokalou, kei na galala ni nodra vakaraitaka nodra nanuma.” (§156)

• Tauri dra: “Nodra sega ni tauri dra era vakaraitaka kina na galala ni vakatulewa ena veiqaravi vakavuniwai e rawa ni caka vei ira. Qori e vakadonui ena veidinadinati ni Veimatanitu kei na Lawa e Rusia.” (§165)

• Sega ni via curu ena mataivalu: “E sega ni beci e dua na lawa e Rusia nira sega ni via curu ena mataivalu ena vuku ni nodra vakabauta.” (§169)

• Noda ivola: “Na ka era cakava me baleta na nodra sokalou, kei na ka e tabaki ena nodra ivola e uqeta na veiyaloni. Qori sara ga na yavu ni nodra vakabauta.” (§157)

• JW.ORG: E kaya na ECHR ni ka e volai ena jw.org e sega ni vakavuna na tikoyavavala. Kevaka era sega ni duavata na vakailesilesi e Rusia ena so na ka e volai ena website, e dodonu mera kerea me kau laivi na veika qori. E sega ga ni dodonu mera vakatabuya kece na website. (§231 kei na §232)

E laurai ena vakatulewa qori ni sega sara ga ni duavata na ECHR kei ira na vakailesilesi e Rusia qai kaya nira veivakaduiduitaki, veitovaki, era lawaki tale ga.” (§187) Kena ivakaraitaki, qo e vica na ka era cakava na mataveilewai e Rusia:

• “Na nodra vakatatabutaki na iVakadinadina i Jiova e Rusia e sega ni yavutaki vakalawa. Ia e laurai ena ivakadinadina nira cakava qori na vakailesilesi e Rusia nira vakaduiduitaki ira na iVakadinadina i Jiova, ra qai vinakata tale ga mera veisautaka na nodra lotu. Era via tarova tale ga na nodra vinakata eso tale mera lewena na iVakadinadina i Jiova.” (§254)

• E vica na cala bibi vakalawa era cakava na vakailesilesi e Rusia. Kena ivakaraitaki, e vakayagataka na Mataveilewai Cecere e Rusia na ka era tukuna eso na kenadau ena veivakaduiduitaki. Era digitaki na kenadau qori mai vei ira na ovisa kei na dauveibeitaki, qai tokona na mataveilewai na nodra ivakamacala ena gauna e rogoci kina. (§203)

• E vakarautaki na lawa ni vakavu tikoyavavala mera veilewaitaki kina na iVakadinadina i Jiova. (§272)

Eda sega ni vakadeitaka na ka ena cakava o Rusia ena lewa e tauca qori na ECHR. Ia eda sega ni vakanuinui vei ira na veiliutaki vakatamata. Eda “namaki Jiova tiko,” me “vukei keda qai noda isasabai.”—Same 33:20.