Ena ika15 ni Julai, sa baci totogitaki tale o Brother Dennis Christensen ni lai biu ena rumu e vakatokai na SHIZO, na vanua era dau vesu kina na cala lalai. Ena rairai vesu tiko ikeri me yacova na ika27 ni Julai. A tau na lewa qori ni oti ga e va na siga nona tokitaki tani mai na SHIZO. Ke na mani vesu tale ena vanua qori ena ikatolu ni gauna, e sa na okati Brother Dennis Christensen na valeniveivesu me dua e “dau voroka na lawa ni valeniveivesu,” e sa na lai biu me ono na vula ena valeniveivesu era dau vesu kina na daubasulawa voravora e vakatokai na EPKT. Ratou na kerea na nona loya o Brother Christensen me rogoci tale na kisi e beitaki kina qori.

E sega ni rawa ni qarava o Brother Christensen na nona itavi e valeniveivesu ni tauvimate tiko. Ia era qai totogitaki koya na kena vakailesilesi. Era vakaroti koya me cakacaka ena vanua ni culacula. Mai na gauna e biu kina e valeniveivesu e sa bibi tiko ga mai na kena mate. Era kaya na vuniwai ni valeniveivesu ni sega ni tauvi koya e dua na mate. Era kaya ni rawa ni cakacaka baleta ni soli na gauna ni cegu kei na vakaukaua yago. Ia e kaya e dua na vuniwai mai tuba ni oti nona dikevi koya, ni sega ni rawa ni cakacaka o Brother Christensen ni tauvimate tiko.

E vakatabui vei ira na vesu tu ena SHIZO me vakau yani vei ira e dua na iyaya, mera volia na kedra, qiri, se me dua e sikovi ira. E vakatarai ena lawa mera veisiko yani na lotu vata kei ira na vesu tiko ena SHIZO. Ia e vakatabui o Bro Christensen me sikovi koya yani na qase ni ivavakoso. Qori nira sa sega ni okati na iVakadinadina i Jiova e Rusia mera dua na isoqosoqo lotu.

E sa tabaki oti ena ika23 ni June, ni sa vakadonuya na Mataveilewai ni Tikina o Lgov me sereki totolo o Brother Christensen, me qai sauma ga vakailavo na vo ni yabaki me vesu kina. Oti ga e vica na siga, era kerea na loya dauveibeitaki me rogoci tale na nona kisi. E vaka ga nira cakacaka vata tiko na vakailesilesi ni valeniveivesu kei ira na loya dauveibeitaki me vosa vakacacataki o Brother Christensen me kua kina ni sereki totolo.

Rau sega ni yalolailai o Brother Christensen kei na watina o Irina. E vakayaloqaqataki keda dina nida raica na sala e tokoni ira kina na nona tamata o Jiova mera vosota tiko ga na ituvaki dredre ena marau.—Kolosa 1:11.