Me vaka sa vakaraitaki ena ika6 ni Feperueri, 2019, e totogitaki Dennis Christensen na mataveilewai ni yasana (Zheleznodorozhniy District Court) e Oryol me yabaki ono e valeniveivesu ena nona vakaitavi tiko ena sokalou. Sa kerei me rogoci tale na vakatulewa qori ena dua na mataveilewai levu.

Na nona totogitaki me yabaki ono o Christensen e valeniveivesu e vakavuna mera kauai kina e levu tale na isoqosoqo e veivanua. E wili kina na matabose e Urope (Council of Europe), na European Union, na ilawalawa e valataka na dodonu ni sokalou e vuravura e tiko mai Merika na United States Commission on International Religious Freedom, kei na Valenivolavola ni Matabose kei Vuravura me Baleta na Dodonu Yadua ni Lewenivanua (United Nations High Commissioner for Human Rights) kei na vica na isoqosoqo era sega ni taleitaka na vakatulewa qori. Era kila tale ga ni sega na yavu vinaka me vakalolomataki tiko kina o Dennis Christensen.

A vakamacala vakatikina na mata mai na U.N. High Commissioner for Human Rights, o Michelle Bachelet, e kaya: “Nona totogitaki vakaukaua o Christensen e vakavuna me laurai nodra dodonu ni vakabauta vakalotu na iVakadinadina i Jiova me cala vakalawa.” E uqeta na matanitu o Rusia me “railesuva qai veisautaka na lawa ni matanitu me baleta na ka dina e vakavuna na tiko yavavala (Federal Law on Combating Extremist Activity), qori o ira ga na dau ivalavala voravora se ra uqeta tiko na veicati.” E tinia o Ms. Bachelet ena nona vakamamasu ina matanitu me “kua ni totogitaki ira na vakayagataka tiko vakavinaka na nodra dui dodonu, me sereki ira tale ga na vesu tu ena vuku ni nodra vakabauta vakalotu, veika era tukuna, se nira dau sosoqoni tiko ena duavata kei ira eso tale.”

Oti ga e rua na siga nona totogitaki o Brother Christensen, ratou yavala sara e le va na kenadau ena veika me baleta na dodonu yadua ni lewenivanua e Rusia, me tuvanaki na veitarotarogi kei ira na dauvolaitukutuku e Moscow. E osodrigi na vanua e vakayacori kina, qai sivia na le 6,000 era sema mai ena internet mera sarava tale ga ena loma ni dua na aua. Ratou tokoni keda kece na iVakadinadina i Jiova na le va qori, nida dau saga na sautu kei na bula veimaliwai vinaka, qai sega ni vinakati meda rerevaki.

Ratou a vakaitavi tale ga ena veitarotarogi qori o Irina na wati Christensen, nona loya, Mr. Anton Bogdanov kei Yaroslav Sivulskiy, na mata ni iVakadinadina i Jiova ena yasayasa vakaUrope (European Association of Jehovah’s Witnesses). Eratou vakamacala ena vuku ni lewa e tau vakatawadodonu, ratou sauma tale ga nodra vakatataro na dauvolaitukutuku.

Sa voleka ni yabaki rua nona vesu tiko o Brother Christensen, ia e marau tu ga, qai dei ena nona nuitaki Jiova. Ni vo ga e vica na siga me tau na iotioti ni vakatulewa e kaya ena mataveilewai o Brother Christensen: “Ena qai matata ga mai na ka dina, me vaka ga e vakarau laurai qo.” Ni wilika oti na Vakatakila 21:3-5, e kaya ena nuidei: “E vakamacalataki e ke. . . . na gauna ena vakayacora kina na Kalou na lewadodonu kei na galala dina meda marautaka kece. Erau veiwekani voleka na lewadodonu kei na noda galala. E vakadeitaka na Kalou ni na vakayacori kece na ka sa nakita tu.”

Ena waraka tiko o Brother Christensen na nona kerekere me rogoci tale nona kisi. Ia ena wawa tiko ga e valeniveivesu a sogo kina ena 20 na vula sa oti, oya na Detention Facility No. 1 ena yasayasa e Oryol.