Ena imatai ni Epereli, 2019 e totogitaki o Sergey Skrynnikov e yabaki 56 ni dua na iVakadinadina i Jiova, ena mataveilewai vata ga e totogitaki kina o Dennis Christensen. E lavaki me sauma e $5,348.00 (RUB 350,000; EUR 4,758.95). E sega ni totogitaki me bala e valeniveivesu, ia era vinakata na veibeitaki me tolu na yabaki e valeniveivesu.

E dua tiko na luvedrau yalewa o Brother Skrynnikov kei na watina o Nina. Rau dau vukei koya, kei na lima na luvena. Rau qaravi rau tale ga nona itubutubu o Nina.

E vakamacalataka ena veidokai kei na doudou o Brother Skrynnikov na ka e vakabauta. E kaya: “Ena rairai lomaleqa e dua e sega ni qarava na Kalou ena ituvaki va qori. . . .  Ia niu iVakadinadina i Jiova, e vukei au na vakabauta me donu tiko ga noqu rai. Ke sa lewa ni Kalou meu vesu, au na raica na tolu na yabaki qori me vaka e dua na ilesilesi vou meu veiqaravi ena dua tale na vanua, sega ni itotogi! Au sega ni lomaleqa. . . . E dua ga na Kalou, ena vukei keimami tale ga ke keimami bala e valeniveivesu se sega. Ena sega ni biuti keimami, ena tokoni keimami tu ga ena vuku ni neimami yalodina vua.”

E uqeti keda dina na dei ni nodra vakabauta na tacida me vakataki Brother Skrynnikov. Nida vakasamataka na veika dredre era sotava, eda nanuma kina nona qaqanimasu na yapositolo o Paula: “Me vakasinaiti kemuni mada ga na Kalou o koya na vu ni noda inuinui, ena marau kece kei na vakacegu ena vuku ni nomuni vakabauti koya, me levu tiko ga kina na nomuni inuinui ena kaukaua ni yalo tabu.”—Roma 15:13.