Ena ika18 ni Tiseba, 2020, e tukuna na mataveilewai na Khostinskiy District Court e Rusia, ni rau cala o brother Nikolay Kuzichkin kei brother Vyacheslav Popov. E totogitaki o brother Nikolay me vesu me dua na yabaki, dua na vula. O brother Vyacheslav me vesu me dua na yabaki, tini na vula. Ia ni laurai vata kei na gauna rau wawa veilewai tu kina e valeniveivesu, e dodonu me rau sa sere. O Nikolay sa sereki ena nona tu vakavesu e vale, ia se vesu tiko o Vyacheslav ena qai sereki ena gauna sa tekivu kina na kena itotogi.

Nikolay Kuzichkin

• Sucu: 1951 (Kostroma)

• Kena italanoa: Oti nona vuli ena koronivuli ni vakatagi, e kenadau sara ena taba piano. E susu oni tale ga. Na watina o Olga, qai tolu na luvedrau tagane

  Tekivu vulica na iVolatabu kei ira na iVakadinadina i Jiova ena veiyabaki ni 1990. Nona raica na vakayacori ni parofisai vakaivolatabu, qori e uqeti koya me yalataka nona bula qai papitaiso ena 1993

Vyacheslav Popov

• Sucu: 1974 (Tomsk)

• Kena italanoa: Ni se gone e daudroini, yaco sara me dua e dau droinitaka na vale (interior designer). E sotavi watina o Yuliya ena gauna rau vuli tu kina ena univesiti, rau vakamau sara ena 1998. E dua na luvedrau yalewa, e rua e rau tagane. Ena 2010, ratou toki ina siti o Sochi. Ratou dau taleitaka vakavuvale na ski (vakasisisi e dela ni waicevata), kei na gade ina veibaravi

  A vulica e liu o Yuliya na iVolatabu kei ira na iVakadinadina i Jiova. Oti nona mate o tamai o Vyacheslav, e vakacegui koya na veika dina ena iVolatabu. E papitaiso sara ena 2004

Ena bogi na ika10 ni Okotova 2019, era yanaraka na ovisa vakalecaleca e 36 nodra vale na tacida ena siti o Sochi, e Rusia. Era vakaiyaragi tu, eso tale era kauta yani na koli.

E tukuni vei ira na qase kei na gone mera davo vakatoboicu ena fuloa ni yanaraki tiko nodra vale. Era kauta na ovisa nodra talevoni, tablet, kompiuta, ivola vakaivolatabu, nodra ivola ni volavola, kei na postcard. Era biuta lo tale ga na ovisa ena so na vale na noda ivola era sa vakatabui tu. Rau mani vesu kina o brother Nikolay Kuzichkin kei brother Vyacheslav Popov. Ena siga e tarava rau bala e valeniveivesu me rau wawa veilewai.

E dau tautauvimate o brother Kuzichkin. Vicavata na gauna nodra sega ni vakadonuya na vakailesilesi ni veilewai na nona kerekere me qaravi vakavuniwai. Era kaya ni vinaka me vesu tiko ni “sega ni bibi sara na kena mate.” Sa qai kuria ga nona tauvimate ni vesu tu ena dua na rumu era tu kina e levu na kaivesu era kana tavako.

E rivarivabitaki nona bula o Nikolay ni vesu tiko, ia e kaya: “Na tu e valeniveivesu e vaka ga eda x-ray tiko, me kilai kina ke tiko vei keda na itovo vaKarisito se sega.” E sega ni vakasamataka vakalevu o koya na ituvaki dredre e sotava. Ia e dau veiyaloni, yalololoma qai saga me vukei ira na kaivesu era yalolailai ra qai via vakamatei ira.

E tosoi vakaono nona wawa veilewai tu e valeniveivesu. Ia ena ika22 ni Epereli 2020, e sereki me lai vesu tu ena nona vale. Sa qai vakadonui ga me qaravi vakavuniwai ena gauna sa malumalumu kina qai dredre ni duri.

E tosoi vaka tinikava nona wawa veilewai tu e valeniveivesu o brother Vyacheslav. E sega ni raici ratou tu nona vuvale me sivia e dua na yabaki.

Eda marautaka dina nodrau ivakaraitaki ni yalodina o Nikolay kei Vyacheslav, kei na nodrau saga tiko ga me rau tokona na veiliutaki cecere i Jiova. Rau sa muria sara tiko ga na ka e kaya na Same 16:8: “E dei tu ga e mataqu o Jiova. Ni tu e ligaqu imatau o koya, au na sega vakadua ni yavalati.”