JUNE 27, 2023
RUSIA

Totogitaki o Brother Skvortsov kei Brother Tibiy

SARAVA/ROGOCA

Ena ika20 ni June 2023, e kaya na mataveilewai na Taganrog City Court of the Rostov Region e Rusia ni rau cala o Brother Aleksandr Skvortsov kei Brother Valeriy Tibiy. E totogitaki me vesu o Aleksandr me vitu na yabaki. E wawa veilewai tu e valeniveivesu me tekivu na ika7 ni Tiseba 2021, ena sega gona ni sere. E rube na kisi nei Valeriy me vitu na yabaki. E sa sereki, ni tu e valeniveivesu me tekivu ena ika18 ni Me 2022.

Kedrau iTukutuku

Aleksandr Skvortsov

Sucu: 1962 (Taganrog)

Me baleti koya: E dau tuki kaukamea (welder)

Rau vakamau kei Larisa ena 1983. Rua na luvedrau yalewa

Tekivu vulica na iVolatabu o Larisa kei ira na iVakadinadina i Jiova qai papitaiso ena 1996. E marautaka o Aleksandr nona rogoca na inuinui ena iVolatabu, ni na sega tale na ivalavala tawadodonu e vuravura. Papitaiso ena 1997

Veilewaitaki ena 2015 qai rube nona kisi me lima veimama na yabaki

Ka e tukuna o watina o Larisa a

Cava e vukei watimu me vosota na ituvaki e valeniveivesu?

Ena loma ga ni dua na yabaki, e veisautaki vaka13 na rumu me vesu kina. E sega ni rawarawa me vosota na nodra itovo na vo ni kaivesu, ia e saga me veimaliwai vinaka kei ira. E dau masulaka qori vei Jiova, dau wilika nona iVolatabu kei na nodra ivola na tacida. E vukei koya qori me kaukaua tiko ga vakayalo. E dau nanumi ratou vakalevu nona vuvale, ia vukei koya o Jiova me lomavakacegu tiko ga.

E tara vakacava nomu veiwekani kei Jiova na ka o sotava qo?

Au sa qai nuitaki koya ga vakalevu. Au vakadeitaka ni lomani keirau o Jiova niu raica na sala e tokoni keirau kina vakaveiwatini. Au dau luluvu niu raica nodra veitokoni kei na nodra masulaki keirau na mataveitacini.

Valeriy Tibiy

Sucu: 1977 (Novopokrovka, Crimea)

Me baleti koya: E dau draivataka na lori lelevu

E mai kila na yaca i Jiova qai tekivu vulica na iVolatabu kei ira na iVakadinadina i Jiova. Papitaiso ena 2004

Rau vakamau kei Kristina ena 2012

Ka e tukuna o watina o Kristina b

E vosota vakacava o Valeriy na ituvaki dredre e valeniveivesu?

E oso na valeniveivesu qai sosa. E masu vakawasoma me lomavakacegu, me soli tale ga vua na kaukaua me vosota. Era raica vua na itovo qori na vo ni kaivesu. Era dau tarogi koya: “O rawata vakacava mo dau lomavakacegu? O iko dau mamarau tu ga!” Ni vukei koya o Jiova me bucina na itovo vinaka qori, e rawa ni dau vakamacala vinaka kina vei ira na kaivesu. Era dau taro ivakasala mada ga vua. E vakila na nona veitaqomaki i Jiova nira rokovi koya e valeniveivesu.

Na tikinivolatabu cava e uqeti iko vakalevu ena gauna qo?

E vukei au na Vosa Vakaibalebale 3:6 meu nuitaki Jiova vakalevu. E tukuni kina: “Mo nanumi koya ena ka kece o cakava, ena vakadodonutaka na nomu ilakolako o koya.” E tawavakaiyalayala na vuku i Jiova. Au vulica ni basika e dua na ituvaki, meu dikeva ena iVolatabu meu kila kina na rai i Jiova. Ena ka kece au sotava, e sega vakadua ni biuti au o Jiova.

Meda vakavinavinakataki Jiova ena nona loloma kei na veidusimaki. E rawa nida vosota kina na ituvaki dredre kece eda sotava.—Same 5:12.

Veitaravi ni Gauna

Maji 20, 2021

Caka na vaqaqara ena vale nei Skvortsov
Tiseba 7, 2021

Caka tale na vaqaqara ena vale nei Skvortsov, wili kina e 29 na nodra vale na tacida e Taganrog. E beitaki ena basulawa qai vesu me wawa veilewai
Tiseba 8, 2021

Vesu me wawa veilewai o Aleksandr
Maji 29, 2022

Beitaki ena basulawa o Valeriy
Maji 31, 2022

Era biuta vata na dauveivaqaqai na nodrau kisi o Aleksandr kei Valeriy
Me 18, 2022

Vesu o Valeriy
Me 26, 2022

Kau o Valeriy ina dua na valeniveivesu me wawa veilewai
Tiseba 6, 2022

Tekivu na veilewai
June 20, 2023

Totogitaki o Aleksandr me vesu me vitu na yabaki. E rube na nona kisi o Valeriy me ono na yabaki

a b Rau sa vesu tu o Brother Skvortsov kei Brother Tibiy ena gauna e vakarautaki kina na ulutaga qo. E sega ni rawa kina ni rau vakatarogi.

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU