Ena ika12 ni Feperueri 2021, e tauca na lewa na mataveilewai na Birobidzhan District Court of the Jewish Autonomous Region e Rusia, ena kisi me baleti Sister Larisa Artamonova. Ena vesu me ono na yabaki, e totogitaki tale ga me sauma e $135 na ilavo ni Merika.

Larisa Artamonova

• Sucu: 1970 (Birobidzhan, e Jewish Autonomous Region)

• Me baleti koya: A labati o tamana ni se qai yabaki tolu. E dauvavavi (pastry chef), e daudroini, e dauculacula tale ga. E vakamau ena 1990. E dua na luvena tagane o Yevgeniy, qai tauvi koya tiko e dua na mate e sega ni dau veitauvi vakalevu. E vakaleqai tale ga na sela ni yago i Larisi, qai vakavuna me momosi na isema ni yagona. Dina ni va tu qori na kena ituvaki, ia e bulabula vinaka. E taleitaka na vodo basikeli, vakasisisi ena waicevata, kei na droini

  Nona dau lomatarotarotaka na veika tawadodonu, na rarawa, kei na veika ca e vakavuna me vulica na iVolatabu kei ira na iVakadinadina i Jiova. E sauma vinaka na iVolatabu na nona lomatarotaro, e papitaiso sara ena 1995

Ena ika25 ni Seviteba 2019, era beitaki Sister Larisa Artamonova na vakailesilesi e Rusia ni daubasulawa. A beitaki tale ga o luvena tagane ena dua tale na kisi. Rau wili tiko kei ira na 22 na tacida era beitaki nira tokona na cakacaka ni dua na “isoqosoqo e uqeta na tiko yavavala,” ena yasana o Jewish Autonomous Region.

Rau kurabuitaka o tinai Larisa, kei nona ta vakacabecabe ni na vesu me voleka ni ono na yabaki, ena vuku ga ni nona vakabauta. Qori e tautauvata ga kei na itotogi a tau vua na tagane a vakamatei tamana.

Rau vakarabailevutaka tiko ga o Larisa kei luvena na nodrau qaravi Jiova, ni bera na veivakacacani e Birobidzhan. E kaya o Larisa: “O na sega ni rerevaka e dua na ka ni o ogaoga ena itavi vei Jiova, qai vaqaqacotaka tiko ga nomu vakabauta, kei na nodratou veika vakayalo nomu vuvale.” E kuria: “Ena saga o Setani me vakacacani keda meda vakabauta ni noda itavi vaKarisito ena sega ni solia vei keda na galala. Ia e vakadeitaka vei keda o Jiova nida na galala dina ke da cakava na ka e vakavulici keda kina.”

O ira na le 22 na tacida era beitaki e Birobidzhan era vakadeitaka tu ni o Jiova e mareqeta nodra yalodina, era vakalasuya tale ga nona veibeitaki o Setani.—Vosa Vakaibalebale 27:11.