Ena ika25 ni Feperueri, 2019 e kerei me dikeva totolo na Mataveilewai Levu e Urope e dau valataka nodra Dodonu na Lewenivanua se ECHR, na veika me baleti Brother Sergey Loginov, e dua vei ratou na vitu na tacida ratou vakatotogani vei ira na vakailesilesi ena ra kei Siberia ena siti o Surgut. Eratou sa sere kena vo, ia o Brother Loginov e se vesu tiko vakawawa ni bera ni rogoci tale nona kisi, qai sega ni vinaka na veiqaravi vakavuniwai e caka vua.

Ena ika 26 ni Feperueri, ni oti ga e dua na siga na kena ciqomi na ivola ni kerekere qori, e totolo sara nodratou raica na kisi qori na ECHR. E kerea na Mataveilewai qai vakarota na matanitu o Rusia me dikevi “vakatotolo” vakavuniwai o Brother Loginov me rawa ni kilai na kena ituvaki “vakayago kei na nona vakasama” de na qai vakaleqai koya tale. Me dikevi tale ga ke veiganiti na totogi e tau. E soli tu ina matanitu o Rusia me raica na kena macala ena ika11 ni Maji, 2019.

Ena rawa ga ni cakava na ECHR na kerekere qori, ke laurai ni sa tu ena ituvaki vakaloloma qai leqataki o koya e beitaki, qai sega ni caka kina e dua na ka. E veiuqeti dina nida raica ni ratou sega tale ni lokuyara na ECHR ena ituvaki qori, ratou cakava sara kina e dua na ka ni oti ga e dua na siga. E vakaraitaka tale ga na ECHR ni ratou na sega ni vakawalena na veivakacacani era sotava voli na tacida.

Ena gauna qo ratou totogitaki tiko e le 19 na tacida e Surgut, e le 3 vei ratou qori se vesu tu vakawawa.

Meda nanumi ira mada ga na tacida ena masu vei Jiova, da qai nanuma dei na vosa veiuqeti i Jeremaia: “E kalougata na tamata e vakararavi vei Jiova, e nuitaki Jiova.”—Jeremaia 17:7.