Ena Moniti na ika4 ni Okotova, 2021, era curuma vakaukaua na ovisa na OMON a na nodratou vale e rua na veiwatini iVakadinadina i Jiova qai mokulaki ratou vakaca. Dua na veiwatini o Brother Anatoly kei Sister Greta Razdobarov, dua tale o Brother Nikolay kei Sister  Liliya Merinov. E yaco na ka vakaloloma qori nira curuma vakaukaua na ovisa e 12 na vale ni iVakadinadina i Jiova ena siti o Irkutsk. Era qai vesu kina e vica na tacida.

Ena ono na kaloko ena mataka lailai, eratou curuma vakaukaua na ovisa na nodrau vale o Anatoly kei Greta. E ratou dreta na ului Greta qai yarataki koya ina dua tale na rumu. Ratou vesuka i dakuna na ligana qai mokulaki koya.

E ratou vakadavori Anatoly na ovisa ena fuloa, vesuka ruarua na ligana e dakuna ratou qai caqelaka nona qavokavoka kei na ketena. E ratou dreta na ligana e qamu tu qai dreti koya cake. Na kena bi e lai vakila sara ga e tabana. Dua na ka na kena mosi, e mavoa tale ga. Ratou mokulaka na ligana qai vakasaurarataki koya me vakatusa ni cala. Me solia tale ga na kedra itukutuku na tacida. E ratou vakalolomataki koya na ovisa ni ratou via sosomaka e dua na tavaya iloilo e muna. E sivia e walu na aua nodratou tiko na ovisa ena nodrau vale o Brother kei Sister Razdobarov.

Nira curuma na ovisa na nodrau vale o Brother Nikolay kei Sister Liliya Merinov, ratou mokuta vakaukaua na matai Nikolay. E lutu ira qai cibati koya. Ni vakilai koya tale, e raica e dua na ovisa ni dabe tu e delana qai mokulaki koya tiko. E vaqera na ovisa qori eso na batina. E ratou dreta na ului Liliya, yarataki koya mai na nona idavodavo qai vesuka na ligana. Ratou qai mokulaki koya vakaca. Oti ratou sa qai vakadonuya me lai vakaisulu vinaka.

E vakatanitaki sara ga na lawa ena ka torosobu ratou cakava qori na ovisa. E rawa ni ratou totogitaki kina ena lawa e Rusia. E wili tale tiko ga o Rusia ena veidinadinati kei na so tale na matanitu ena nodra taqomaki na lewenivanua mai na veivakalolomataki. E ratou na kauta gona na veiwatini na nodratou kisi ina mataveilewai e Rusia kei na so tale na matanitu.

Ni oti ga e rua na siga, e ratou vesu e ono na tacida me ratou wawa veilewai: Qori o Yaroslav Kalin, Sergey Kosteev, Nikolay Martynov, Mikhail Moish, Aleksey Solnechny, kei Andrey Tolmachev. Era lako yani ina vale ni veilewai e rauta ni 300 na tacida mera vakaraitaka nodra veitokoni.

Vei kemuni kece na mataveitacini e Rusia, keimami duavata kei na ka e tukuna yapositolo o Paula vei ira e Cesalonaika: “Oya na vuna keitou dau sakitaki kemuni kina ina ivavakoso ni Kalou ena vuku ni nomuni vosota kei na vakabauta ena veivakacacani kece kei na veika dredre oni sotava tiko.”—2 Cesalonaika 1:4.