Ena Lotulevu na ika16 ni Me, 2019, e voleka ni dua na aua nona vosa tiko o Dennis ni rogoci tale nona kisi. Wilika mada na veika e tukuna (vakadewataki mai na vosa vakaRusia) ena mataveilewai:

Qo na ka e cavuta e dua na tamata ca ena vica na yabaki sa oti: ‘Na levu ni lasu e cavuti, e rawa ni veisautaki me itukutuku dina,’ se ni dua e lasu vakavica vata na udolu e rawa ni vakabauti ni dina. Qori na vuna era vakabauta kina e levu ni dina na itukutuku lasutaki, mani vakavuna na rarawa kei na leqa vei ira na sega ni cala.

Na veika e cavuti qori sa yaco makawa sara, e nanumi gona nira na vuli kina o ira na vuli vinaka ena ika21 ni senitiuri.

Ia e sega ni laurai qori ena ka au beitaki kina kei ira kece na iVakadinadina i Jiova e Rusia. Na lasu tale ga qori e vakavuna na rarawa, vakaleqai ira tale ga na sega nodra cala.

Au beitaki vakailasu niu cakava tiko ga na cakacaka sa vakatabui e sema tiko ina Oryol Local Religious Organization (LRO) ni iVakadinadina i Jiova, e raica na mataveilewai ni vakavuna na tiko yavavala. Au cakava lo tale ga na cakacaka e tokona na veika qori.

Na veibeitaki qori e cavuti vakavica vata ena noqu kisi ena veigauna sa oti, qai sega na kena ivakadinadina. Ena sala qori era saga kina mera vukica na itukutuku lasu me dina.

Ia au via vakaraitaka ga vakadodonu niu sega ni lewe ni Oryol LRO ni iVakadinadina i Jiova, era lewena eso na iVakadinadina i Jiova.

Au sega ni cakitaka niu iVakadinadina i Jiova. Au dau tokoni ira noqu itokani ena soqo ni lotu kece e cakava na ivavakoso, ia e sega ni sema ina Oryol LRO ni iVakadinadina i Jiova, e donu tale ga vakalawa qai salavata kei na idusidusi se Article 28 ni Lawa ni Matanitu o Rusia.

Au sega vakadua ni tomana na cakacaka e vakatabui ni Oryol LRO ni iVakadinadina i Jiova, se meu beca e dua na lawa ni matanitu o Rusia. Au sega tale ga ni bau vakaitavi ena dua na cakacaka e vakavuna na tiko yavavala.

Levu era dau tarogi au: “Cava e tukuni kina nira vakavuna na tiko yavavala na iVakadinadina i Jiova? Cava tale ga na kena ivakadinadina e tu?” Au dau kaya ga: “Au sega ni kila!”

O ira na iVakadinadina i Jiova era dau lomani ira era tiko veitikivi me vakataki ira. Era saga mera caka vinaka vei ira ena itikotiko (na cakacaka e yaga ina itikotiko). Era dau dina, muria na lawa, saumi vakacavacava tale ga. Na cava sara mada e laurai nira cakava e “vakavuna na tiko yavavala?” Au sega sara ga ni kila, me yacova mai qo se bera tiko ga ni saumi na taro qori ena mataveilewai.

Au beitaki niu tomana tiko ga na cakacaka ena dua na isoqosoqo lailai e vakadonui tu vakalawa, ra qai lewena e rauta ni le tini. Ia e tukuna na mataveilewai ni vakavuna na tiko yavavala. Na cava au cakava kei na gauna cava au cakava kina na cakacaka qori? Cava sara mada e dusia niu vakavuna na tiko yavavala?

E sega vakadua ni bau saumi na taro ruarua qori ena gauna e caka tiko kina na veilewai. Na vuna? Nira vukica tiko ga na itukutuku lasu me dina!

Eso era saga sara tiko ga vakaukaua e Rusia mera vakaucacataki keimami na iVakadinadina i Jiova, ni keimami dau vakavuna na tiko yavavala. Ia e itukutuku lasutaki kece qori. Keimami sega ni dau vakavuna na tiko yavavala. Oni kila na vuna?

Kena imatai, keimami sega ni vakayagataka na dakai se cakava na itovo voravora. Ena iKarua ni iValu Levu e levu era bolemate nira sega ni via vakaitavi ena mataivalu ni Jamani, na Wehrmacht. Era sega ni gole ina bucanivalu ena Eastern Front, ra sega tale ga ni vakamatei ira na lewe ni mataivalu vaKominisi.

Keimami vakatotogani ena vanua vakaRusia, keimami sa okati tale ga ni keimami sega ni dau tokona na veika vaKominisi. Ia keimami lomani ira tiko ga na dauveitusaqati.

Nikua, keimami duavata e veiyasa i vuravura mai na veimatanitu kei na duidui matatamata. Keimami uqeta na bula veiyaloni. Qori e ivakadinadina nida rawa ni raibaleta na duidui e tawasei keda tu.

Kena ikarua, e sega ni dua tale na vanua e vuravura, o Rusia ga e beitaki keimami tiko ni keimami vakavuna na tiko yavavala. Keimami sokalou ena galala kei na vakacegu ena sivia na 200 na vanua. Keimami dauveiyaloni, sega tale ga ni tokona na tiko yavavala.

Keimami vakabauta ga na ivakavuvuli e yavutaki ena iVolatabu. E uqeti keimami qori me keimami vakaraitaka na na itovo vinaka me vaka na loloma, marau, vakacegu, vosovoso, yalololoma, yalovinaka, vakabauta, [yalomalua], kei na lewai iko vinaka.

E vakatokai ena iVolatabu na itovo qori me “vua ni yalo tabu,” na itovo tale ga qori e sega ni vakavuna na veileti ena itikotiko. E veibasai sara ga kei na ka e uqeta na tiko yavavala. Ia era yaga ena noda dui bula.

Kena ikatolu, o ira mada ga na tokona nodra dodonu na lewenivanua e Rusia era saqata e dua na lawa na Russia Law on Counteracting Extremist Activity, keimami beitaki kina ni keimami vakavuna na tiko yavavala. Era kaya kina e levu ni vakarogorogocataki Rusia sara ga na veika qori, baleta ni kilai na matanitu qori nira dau muria na lawa na lewena. Ke ra raica nira vakavuna dina tiko na na iVakadinadina i Jiova na tiko yavavala, era na sega ni saqata na lawa qori.

Kena ikava, era saqata tale ga e levu e veiyasa i vuravura ena kena vakayagataki na Law on Counteracting Extremist Activity to Jehovah’s Witnesses e Rusia. E uqeti ira kina na vakailesilesi e Rusia na matabose e Urope na Parliamentary Assembly of the Council of Europe mera kua ni vakayagataka tiko na lawa vei keimami. Vakavica na kena kauia tiko na U.N. Human Rights Committee, ni vakayagtaka tiko o Rusia na lawa qori me vakacacana neimami duavata, beitaki tale ga vakailasu.

E vakasalataki ira nona imuri o Jisu Karisito: “Ke ra vakacacani au, era na vakacacani kemudou tale ga.” (Joni 15:20) a Cava na kena itinitini? E beitaki ni cala, e vakamatei tale ga ena veibeitaki lasu ni vakavuna na tiko yavavala, dua dina na ivakadinadina levu ni lewa ca.

Ia eda sega ni bula tiko qo ena imatai ni senitiuri, se na ika5 ina ika15 ni senitiuri. Eda bula tiko qo ena ika21 ni senitiuri, na gauna e dodonu me rogoci kina na dodonu yadua ni lewenivanua, soli tale ga na galala ni sokalou.

Vakacava e dodonu me tukuni vua e dua me kua ni vakabauta na Kalou, qai tini bala e valeniveivesu ni vakabauta na Kalou? Au vakabauta ni cala qori. E yaco ga qori ena matanitu e voravora na kena veiliutaki, sega ni matanitu e dau muria na lawa. Ia au vakabauta ni muria vinaka tiko na lawa o Rusia.

Noqu veilewai tiko qo, au rogoca nira kaya tiko eso e Rusia, ni o koya e vakabauta qai sega ni rere ni tukuna nona vakabauta sa vakavuna sara ga na tiko yavavala. E sega ni vakaibalebale qori, ni tamata lotu kece era kaya nira lewena tiko na lotu dina. Ke dua e sega ni vakabauta ni dina na nona lotu, cava me lewena tiko ga kina?

Ke vakayagataki na ile qori me beitaki kina e dua e vakavuna na tiko yavavala, ena wili tale ga kina o Jisu Karisito. E kaya vei Ponitio Pailato: “Qo na vuna au sucu mai kina, qo tale ga na vuna au lako mai kina i vuravura meu tukuna na ka dina. O ira kece era totaka na dina era rogoca na noqu vosa.”—Joni 18:37.

Io, e tiko ga ena iVolatabu na ka dina. E vunautaka na ka dina o Jisu, vakavulici ratou tale ga kina nona tisaipeli. E sega ni vosa tu ga vakararaba o Jisu me balete na ka dina. E vakabibitaka ga na ka e vauca na inaki ni Kalou. Na inaki ni Kalou e baleti Jisu, “na luvei Tevita” (nona kawa), me veiqaravi vaka Bete Levu, me Tui tale ga ni Matanitu ni Kalou.

E vakamacalataka tale ga o Jisu na inaki levu duadua ni nona lako mai vuravura kei na nona cakacaka vakaitalatala, oya me tukuna na ka dina me baleta na Matanitu ni Kalou. Vakacava era na kaya e levu nikua ni nona vunautaka o Jisu na ka dina e vakavuna na tiko yavavala?

Keimami vakatotomuria gona nona ivakaraitaki, vunautaka tale ga na ka dina ena iVolatabu, ni Matanitu ni Kalou duadua ga e iwali ni noda leqa kece. Keimami wasea tale ga vei ira kece na tamata na ka e volai tu ena Vosa ni Kalou na iVolatabu.

E masu vua na Kalou o Jisu, e kaya: “Ni vakasavasavataki ratou ena ka dina, e ka dina na nomuni vosa.” (Joni 17:17) E bibi gona vei keda kece meda vulica na ka dina ena iVolatabu. E yaga qai sega ni vakavuna na tiko yavavala.

E levu tale ga e veiyasa i vuravura era vakabauta na iVolatabu. E kaya na saenitisi ni Rusia o Mikhail Lomonosov: “E vakarautaka na Dauveibuli e rua na ivola vei keda. Dua e vakaraitaka kina nona lagilagi, na kena ikarua, na nona inaki. Na kena imatai oya na vuravura qo . . . Kena ikarua na iVolatabu.”

E macala ga ni vulica vinaka na iVolatabu o Lomonosov, e dina tale ga na ka e kaya. Eda rawa ni vulica e levu na ka me baleta na Kalou nida dikeva nona ibulibuli. Ena levu tale ga na ka eda vulica me baleti koya nida wilika, vulica, qai dikeva nona Vosa, na iVolatabu.

E tukuna na iVolatabu me baleta na ka e volai kina: “E vakavuna na Kalou na iVolatabu kece, e yaga me veivakavulici, . . . me veidusimaki ena ka e dodonu, me vakarautaki vinaka kina na tamata ni Kalou, me tu vakarau tale ga me vakayacora na cakacaka vinaka kece.” (2 Timoci 3:16, 17) Me vakayacori kina na cakacaka vinaka kece!

Na soqoni vaKarisito gona au dau tiko kina, keimami na veivosakitaka sara ga na sala me vakayacori kina na cakacaka vinaka va qori. Na soqoni qori e tokona na isoqosoqo lotu e sega ni sema ina veika vakalawa ni Oryol LRO ni iVakadinadina i Jiova.

Ena rua na vidio e vakaraitaki ena mataveilewai me baleta na neimami soqoni ena ika19 kei na ika26 ni Feperueri, 2017, e sega sara ga ni laurai se rogoci kina e dua na ka e vakavuna tiko yavavala. Keimami veitalanoataka ga na iVolatabu ena yaga vei keda kece. E veivakacegui qai marautaki na soqoni qori, vakilai kina na duavata me vaka ga na ka keimami kilai tani kina.

E sega ni vakavu leqa vua e dua na veika vakaivolatabu e veivosakitaki. Ia era vukei ra qai vakacegui kina e levu. E veivakavakacegui vei ira lolosi na yalayala ni iVolatabu qo: “Na iotioti ni meca me vakamalumalumutaki o mate.”—1 Korinica 15:26.

E meca rerevaki o mate vei ira e levu, ia e sega vua na Kalou. E yalataka ena Aisea 25:8: “Ena tiloma vakadua o koya na mate, ena qusia na Turaga Cecere Duadua o Jiova na wainimata mai na matadra kece.”

Vakasamataka mada na gauna qori! Sa na sega tale na veibulu kei na ibulubulu. Ena sosomitaka na tagi ni lolosi na marau ni sa na vakayacora na Kalou na nona yalayala me vakaturi ira na mate. Kena itinitini ena oti vakadua kece na mosi e salavata mai na mate.

E dau vakacegui au sara ga na veika qori ni levu tale ga na wekaqu lomani era sa takali. Ena gauna au vesu tu kina, e mate e dua na wekaqu voleka, e dau vukei au vakalevu—o noqu bu, o Helga Margrethe Christensen.

E vulica eliu ena neitou vuvale na iVolatabu, mani dua sara na iVakadinadina i Jiova. E vakavulica taumada na ka dina ena iVolatabu vei Tamaqu, tarava yani o yau. E levu na kilai me vakataki ira na tiko ena neitou yasayasa, ira na weka, kei na ira itokani era dau taleitaki koya ra qai dokai koya vakalevu.

E marama dauloloma, veidokai tale ga, ke duidui mada ga nomu vakabauta, vanua o cavutu mai kina, se roka ni yagomu. E dauveivukei, qai dau caka vinaka vei ira na tiko voleka. Ka ni rarawa ni so era kaya ni dau vakavuna na tiko yavavala. Ia o ira ga na yalomatua era sega ni duavata kei na ka e beitaki kina qori.

Au waraka tu qo na siga ena vakaturi koya kina na Kalou, me keirau na sota tale. A sega ni tiko rawa ena nona veibulu. A sega tale ga ni rawa niu vakacegui ratou noqu vuvale ena gauna dredre qori, niu a vesu tu niu beitaki niu vakavuna na tiko yavavala.

Na inuinui ni nodra vakaturi na mate e vakarautaka na iVolatabu e vakacegui au, e vakadeitaka tale ga ni sega ni lekaleka ga nona takali, ni keirau na veisotari tale ena dua na siga ena vuravura vou e veiliutaki kina na Matanitu ni Kalou. Ke vakacegui au qai vukei au na inuinui qori, au nuidei nira na vakila tale ga qori eso tale.

Dua tale na ulutaga vakaivolatabu e dau veivosakitaki ena neimami soqoni oya ni sa na paraitaisi na vuravura ena veigauna se bera, ena levu kina na kakana, era na duavata tale ga na kawatamatama, sa na sega na tauvimate me vaka ga e parofisaitaki ena Aisea 33:24: “Ena sega ni kaya e dua na lewenivanua: “Au tauvimate.” O ira na tiko ena vanua ena vosoti na nodra cala.”

Vakacava e veivakaleqai na vakamacalataki ni vosa ni yalayala qori? Sega, era rawa ga vakanuinui kina e levu, ra marautaka tale ga. O Jisu sara mada ga e kaya: “Era marau o ira na rogoca na vosa ni Kalou ra qai muria tiko ga!”—Luke 11:28.

Qori ena qai vakatau vei keda yadua meda vakabauta se sega. E sega ni vakasaurarataki e dua na Kalou me qaravi koya. E kaya na Jeremaia 29:11: “‘Niu kila vinaka na ka au nanuma tiko me baleti kemuni,’ e kaya o Jiova, ‘na nanuma moni tikovakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai.’”

E vakarautaka vei keda na Kalou na bula vinaka duadua oya meda veiwekani voleka kei koya. Era veisureti gona na iVakadinadina i Jiova vei ira e levu mera digia na bula vinaka duadua, oya mera veiwekani voleka kei na Kalou, ni na rawati kina na bula tawamudu. E sega ni laurai vakadua kina na tiko yavavala. Na cakacaka cava au cakava e “vakavuna na tiko yavavala”? Cava tale ga meu totogi yabaki ono kina e valeniveivesu?

Au sega ni dau basulawa se vakavuna na tiko yavavala. Era dau tukuna ga e levu na ka vinaka me baleti au na tiko volekati au, ira na ovisa vaka kina o ira na vakailesilesi ena vanua au vesu tu kina. Koya gona, au via taroga ga tale qo: “Na cakacaka cava au cakava e “vakavuna na tiko yavavala,”? Cava tale ga meu totogi yabaki ono kina e valeniveivesu?”

E se sega tiko ga ni matata qori vei au ena gauna qo, vaka kina na rua na yabaki sa sivi. De dua ena saumi na noqu taro ena mataveilewai ena rogoci tale kina noqu kerekere na Court of Appeals, ni sega ni saumi rawa ena mataveilewai au a veilewaitaki kina.

Me vaka au sa cavuta oti, eda bula tiko qo ena ika21 ni senitiuri, sega ni na ika5 ina ika15 ni senitiuri. Sa levu sara na veivakatorocaketaki. Ia e rarawataki nira se vakacacani tiko ga eso e Rusia ena vuku ni nodra vakabauta, ra vakatotogani sara mada ga.

E vakatotogani ratou e le vitu na iVakadinadina i Jiova na Komiti ni Veivaqaqai e Surgut ena ika15 ni Feperueri, 2019 ni vakasaurarataki ratou me ratou cavuta na ka era via rogoca. A sega ni vakadonui me ratou muria na lawa ena idusidusi se Article 51 e vakamatatataki tu ena yavu ni vakavulewa e Rusia me baleti ira kece na lewenivanua e kea, oya ni sega ni dua e Rusia e rawa ni soli ivakadinadina tale me baleti koya se me cakitaka kina e dua.

Eratou vakaukauataki me ratou tekiduru,ratou laveta na ligadratou, oti sa qai mokulaki na uludratou kei na yagodratou, ratou vakamadualaki ena vuku ni nodratou vakabauta kei na vanua ratou cavutu mai kina; e vakataqari tale ga e uludratou e dua na kato e tepitaki wavoki me yaco sara e domodratou me ratou kua kina ni cegu, qai vesu na ligadratou kei na yavadratou. Eratou karalaki qai vakaukautaki me ratou cavuta eso na ka. Ena so na gauna eratou nanuma ga na le vitu qori ni ratou sa na mate, se ratou sa voleka ni viba ni sogoti tiko nodrataou icegu. Eratou sui ena wai, ratou vanai tale ga ena dakai livaliva me kati ratou.

Na ka kece qo e maroroya vinaka e dua na kenadau, ia e sega ni dua na itotogi e tau ena ka eratou cakava qori na Komiti ni Veivaqaqai. O ira mada ga era nuitaki era sega ni bau veivuke, ia eratou beitaki ira ga na iVakadinadina nira vakavuna na ka e yacovi ira. Dua dina na ka vakaloloma! Era veidabuitaki dina!

Na ka e yaco qo e vakarogorogocataka sara ga na itukutuku me baleti Rusia, au nuitaka tale ga nira na lewai qai totogitaki o ira na cakava na ivakarau qori. Era doudou vakacava ni cakava qori? E rawa vakacava nira vakayagataka na iwalewale rerevaki, e veivakalolomataki a cakava tale ga o Hitler kei Stalin? Au nuitaka ni sega ni caka qori. Au nuitaka mai vu ni lomaqu ni na vakadodonutaki vakatotolo na cala eratou cakava!

Qo na ka e kaya na mataveilewai: “Ena okati me basulawa na kena sega ni muri na vakatulewa ni mataveilewai me tarovi na cakacaka ni dua na isoqosoqo lotu e dau vakavuna na tiko yavavala, ena vinakati gona me tau na itotogi.” Matata vinaka qori. Ia cava sara mada noqu cala?

Sega sara ga niu kila se cava meu okati kina ena veibeitaki qori! Au sega ni lewena na Oryol LRO ni iVakadinadina i Jiova. Se meu tomana tiko ga nodra cakacaka sa vakatabui qori.

Na ka kece au cakava e vauca noqu bula vaKarisito ena ivavakoso au lewena e sega ni bau okati ena veika vakalawa me baleta na Oryol LRO ni iVakadinadina i Jiova. Au muria na lawa ena ka kece au cakava, e salavata tale ga kei na idusidusi se Article 28 ni Lawa ni Rusia.

Au sega tale ga ni cakacaka lo tiko meu tokona kina na sasaga ni Oryol LRO ni iVakadinadina i Jiova. Ena dua na noqu veitalanoa ena talevoni, e rogoci tale ga ena mataveilewai, au kaya vua e dua noqu itokani: “Eda lewe ni dua na isoqosoqo lotu. Eda sa sega ni sema tale tiko ina LRO se nodra valenivolavola na iVakadinadina i Jiova.”

E sega ni duavata kina na mataveilewai, qai vakayagataka ga nona itukutuku lasu o A. P. Yermolov, e vakailesilesi ni dua na tabana ni matanitu na Federal Security Service (FSB), ia cakacaka vakavunivuni tiko me nanumu ga ni iVakadinadina. E rawa ni vakadinadinataka qori na mataveilewai a kerei me rogoci tale kina na kisi qori, ni yaca buli ga na A. P. Yermolov, na yacana dina o Oleg Gennadyevich Kurdyumov.

E kaya taumada o Oleg Kurdyumov ena nona ivakadinadina vei ira na veivaqaqai ni sega ni kila e dua na ka, muria tiko na nona nona me vaka e volai tu ena idusidusi se Article 51 ni Lawa ni Rusia. Ia ena siga ga e tarava, sa veisautaka tale nona itukutuku ni vakayagataka na yacana buli na A. P. Yermolov. Oti ga qori sa tekivu vakayagataka sara tiko ga na yaca qori ni soli itukutuku se ivakadinadina.

Ena gauna eda sarava kina ena valeniveilewai na rua na vidio me baleta na soqoni vaKarisito e caka ena ika19 kei na ika26 ni Feperueri 2017, e sega sara ga ni bau sema ina Oryol LRO ni iVakadinadina i Jiova, e matata vinaka ni a katona lo na vidio qori o Oleg Kurdyumov ni vakacagau tiko na soqoni. E lasa dina ni laurai levu sara tu ga nona katokatoni tiko. Ena gauna e toso kina, e toso tale ga na itaba, ni dua tale ga e torovi koya yani, e rawa ni rogoci vinaka saraga na ka e kaya ni vakatakilai koya, “Bula, na yacaqu o Oleg.”

E vakaraitaka qori ni dua na vakailesilesi vuni ni FSB, e katona na ka e caka tiko ena soqoni. Oti, ni vakayagataka na yacana dina, e kaya ni sega ni kila e dua na ka. Ena siga ga e tarava, e lasu ni vakayagataka na yacana buli, e veitaravi nona lasu tiko e valeniveilewai, baleta ga ni cakacaka lo tiko. Vakacava e donu na ka e cakava tiko qori?

O ira na vakailesilesi vuni FSB e dodonu vakalawa mera kua ni soli vakadinadina ena mataveilewai. Ia o ira na dauveibeitaki ni matanitu, na valenivolavola ni veibeitaki, kei na turtaganilewa, era vakalecalecava sara ga na veika qori, ra solia ga na galala me kaya na itukutuku lasu. Na nona ivakadinadina sara ga qori au mai beitaki tu kina qo. Au sega mada ga ni kila se rawa vakacava ni vakatara na mataveilewai me yaco tu e dua na ka va qori.

E vakavuna noqu veilecayaki niu vakasamataka ni vakatara sara tu ga na tabana ni veibeitaki, kei na kena valenivolavola, me yaco tu e dua na ka va qo. E dodonu me ratou raica na muri vinaka ni lawa kece e Rusia, me kua ni dua e beci. Ia era vakatara ga me yaco na veika ca qo ena nodra vakalecalecava tiko.

Au kerea tiko gona na mataveilewai e dau rogoca tale na kisi meu bau rogoci mada. Au sega ni cati ira na veibeitaki qo. Era tamata vinaka qai veidokai, au na taleitaka meu na bau gunu kofi vata kei ira ena veigauna se bera, de dua keimami na dredrevaka tu na veika e yaco qo. Ia au sega ga ni taleitaka na ivakarau ni nodra cakacaka, e torosobu dina.

Au kila ni saga na mataveilewai me vakayagataka e dua e mai cakacaka lo tiko, ia e dua na vakailesilesi ni FSB. Ni sega tu ni vakavulici vinaka nona lewaelomani, e rawarawa sara me lasu, veisautaka na itukutuku dina, se saga ena nona ivakamacala kece ina mataveilewai meu beitaki ga kina niu cala.

Na ivakadinadina va qori me kua ni dau nuitaki, sega tale ga ni ivurevure ni ka dina. E sega ni donu ni vakayagataki e dua na ivakadinadina lasu mera curu kina e valeniveivesu o ira na sega nodra cala.

Au sa dau rairai mai na mataveilewai ena vicavata na gauna, ia na rua na yabaki sa oti au vakaraitaka ina mataveilewai ni sa rui balavu na noqu vesu tu meu wawa veileiwai, au kaya : “Au via marautaka tale noqu bula!” Se sega ni veisau noqu kerekere me yacova mai qo.

Me baleta noqu vesu tu, au kila ni nodra inaki sara ga meu tu taudua, me vakatulewataki tale ga niu cala. Era vinakata tale ga meu yawaki ira lewenivanua, mera kua ni vakalevu na veika au beitaki tiko kina.

Au raica gona niu vesu sara tu ga qo vakatawadodonu, au vakalolomataki ga kina. E kena inaki ga me vakaleqa noqu valataka na dodonu e tu vei au, se meu talanoa ina tabana ni vakaitukutuku me baleta na kequ ituvaki. Ia ena qai yaco ga mai na gauna qori!

Io, au vinakata meu bau marautaka tale noqu bula, meu bula vakacegu qai mamarau ena siti totoko qo kei na watiqu o Irina. Sa oti vinaka qo e rauta ni rua na yabaki, noqu sega ni marautaka tu na bula. Au sega ni lewa na bula au sa tu kina nikua.

Era vakacacana na kequ irogorogo na FSB. Era lawakitaka na veika vakaivola kei na nodra vakadidike, ra vakayagataki tale na ivakadinadina lasu se vuni meu beitaki kina vakailasu ena valeniveilewai.

Na ka era cakava qo e veisautaki kina na veika e kilai me baleti au, niu sa sega ni dua na turaga dausokalou e saga na bula veiyaloni, ia au sa vaka tu e dua e rerevaki nona ivalavala, au dau vakavuna na tiko na tiko yavavala e Rusia. Ia e lasutaki na ka kece au beitaki kina qori.

Sa bau dua dina na veivakalolomataki levu ni tokona tale tu na veibeitaki qori na valeniveilewai, ra qai vakalecalecava na itukutuku dina. Kemuni saka na Turaganilewa, noqu vakamamasu me tini na lasu qori, me vakavotui ga na ka dina. Noqu kerekere bibi ga, “Meu bau marautaka tale noqu bula!”

Me vaka ga au tukuna ena tolu na vula sa oti ena mataveilewai: “Au na duavata ga kei na vakatulewa meu sere, kerei noqu veivosoti, qai vakalesui tale mai na veika au vakayalia. Noqu kerekere lailai sara qori!” Se sega ni veisau qori.

Ke tau e dua tale na vakatulewa, au sa na lai kerekere sara ina Mataveilewai me baleta na nodra dodonu na lewenivanua e Urope e Strasbourg. Ena qai rogoci dina e keri na noqu kerekere.

E kurabui na Mataveilewai me baleta na nodra dodonu na lewenivanua e Urope, o ira na lewenivanua e veiyasa i vuravura, vakabibi o ira na vakailesilesi cecere e Rusia, wili tale ga kina na peresitedi ni Rusia o Vladimir Vladimirovich Putin, nira sega ni rawa ni raica na tikina qo na mataveilewai e Oryol. Ni yavutaki na veika au beitaki kina ena lasu, e cavuti vakavica vata na lasu qori me yacova ni sa vakabauti ni dina.

Vakacava e dodonu me va sara qo na dede ni kena sagai me tau na lewadodonu? Ke vakatulewataka na mataveilewai e rogoci tale kina qo noqu kisi niu cala, meu valataka tiko ga noqu kisi, ia e ka ni marau moni kila na tiko kece e ke nikua, kei kemuni tale ga na rogoca na veilewai qo: “Au sa vakarau tu qo!”

Au na sega ni soro niu kila niu sega ni cala ena veibeitaki qo, au tukuna tale tiko ga na ka dina. Au sega ni rere na bala e valeniveivesu, ke sega ni donu mada ga na vakatulewa e tau.

Au sega ni rere, au sega tale ga ni lomaleqa. Dua na ka noqu lomavakacegu, au sega ni taqaya. Ena sega ni biuti au na noqu Kalou o Jiova, au raitayaloyalotaka sara tu ga na vakayacori ni veivosa totoka qo:

Jiova e rui dodonu,

Nanuma noqu dauloloma.

E dau kabiti au ga,

Jiova noqu itokani ga.

Kalou vakarautaki

au ni bera na icavacava.

Io, sai Jiova na Tamaqu,

Noqu itau.

Qori saka na kena levu. Vinaka na vakarorogo!