Ena ika18 ni Tiseba 2020, * ena vakataulewataka na mataveilewai na Leninskiy District Court of Rostov-on-Don, e Rusia na kisi me baleti Brother Semyon Baybak. Ratou vinakata na dauveibeitaki me vakatatabutaki o Semyon me va na yabaki.

Semyon Baybak

• Sucu: 1997 (Rostov-on-Don)

• Kena italanoa: E rua na tuakana. E vulica na vosa vakaJaina qai dauveivakavulici kina. Dau taleitaka na vola ivola kei na serekali

• Ni se gone, rau vakavulici koya na nona itubutubu ena veika me baleti Jiova. Tekivu bucina tale ga me muria na ivakasala vuku ena iVolatabu. E uqeti koya nona vakabauta me kua ni curu ena mataivalu. Ena 2015 me yacova na 2017 e dau sasamaki ena nodra valenibula na gone me isosomi ni nona curu ena mataivalu

Ena ika22 ni Me 2019, era curuma vakaukaua na ovisa e 13 nodra vale na iVakadinadina i Jiova e Rostov-on-Don. Ni oti e rua na macawa ena ika6 ni June 2019, a tekivu vaqaqai o Semyon vei ira na ovisa. E mani vesu tu me dua na siga, qai vakatabui me biubiu e nona vale ni oti nona veilewaitaki. E dodonu me totogitaki me walu na macawa, ia e tosoi vakavitu qori.

Era beitaki koya na vakailesilesi ni “basulawa” ena nona vakaitavi tiko ena soqoni kei nona vunautaka vei ira eso tale na ka e vulica mai na iVolatabu. Ena Noveba 2019, era beitaki koya tale ga ni vakailavotaka tiko e dua na isoqosoqo e vakavuna na “tiko yavavala.”

Nira tusaqati tiko na tacida e Rusia, eda kila ni o Jiova “na Kalou ni veivakacegui” ena vakaiyaragitaki ira tiko ga ena ka vinaka mera “cakava na lomana.”—Iperiu 13:20, 21.