Ena ika22 ni June 2021, e kaya na mataveilewai na Zavodskiy District Court of Kemerovo mai Rusia, ni cala o Aleksandr kei Sergey. Rau na vakatatabutaki i vale me va na yabaki.

Aleksandr Bondarchuk

• Sucu: 1974 (Topki, Yasayasa o Kemerovo)

• Me baleti koya: Takali o tamana ni se qai yabaki 19. Vulica me draivataka na lori lelevu ni tarataravaki. Toso na gauna e vulica na cakacaka vakamatai. Gauna qo, e dau vakavinakataka na boila (boiler). Taleitaka na siwa, vakasisisi ena waicevata, vodo basikeli, e daucici tale ga

• Rau vakamau kei Elena ena 1992. E vulica i liu o Elena na iVolatabu kei ira na iVakadinadina i Jiova. E dei nodrau bula vakawati ni rau muria na ivakavuvuli vakaivolatabu. E rua na luvedrau tagane

Sergey Yavushkin

• Sucu: 1960 (Rubtsovsk, Altai Territory)

• Me baleti koya: Vica vata na yabaki nona daunilivaliva, e dau buli kaukamea tale ga. Gauna qo e dau caka loka (locksmith). Ni se itabagone, e taleitaka na qiri qita, e vakaitavi tale ga ena levu na qito

• Rau vakamau kei Tatiana ena 1990. Oti ga vakalailai rau vulica sara na iVolatabu kei ira na iVakadinadina i Jiova. Rau taleitaka vakalevu ni iVolatabu e ivola makawa, ia se yaga tiko ga na kena ivakavuvuli ena gauna qo. Dua na luvedrau yalewa, dua e tagane

Ena ika22 ni Julai 2019 ena ono na kaloko ena mataka, era curuma vakaukaua na ovisa na nodrau vale o Brother Aleksandr Bondarchuk, kei Brother Sergey Yavushkin. Qori sa ikarua ni gauna e caka kina, rau mani vesu na tacida tagane qo, rau vakatarogi tale ga na dui watidrau. Era taura tale ga na ovisa na nodratou iyaya vakalivaliva.

Rau vesu me rua na siga o Aleksandr kei Sergey. Oti rau suka i vale, qai vakatatabutaki rau na mataveilewai na Central District Court of Kemerovo me rua na vula. E qai tosoi vakaono na kedrau itotogi.

Gauna rau vakatatabutaki kina, e sega ni vakadonui me rau gole ina dua na vanua e sivia e 300 na mita mai na nodrau vale. E sega ni rawa gona me rau lai cakacaka. Ni bera ni rau totogitaki, rau dau kilai tu ena vinaka ni nodrau itovo ena vanua rau tiko kina, e vanua tale ga ni cakacaka. E veitaratara sara na nodrau boso ni cakacaka vei koya e vaqaqa tiko na nodrau kisi, ke rawa ni vakatarai me rau lai cakacaka. Ia e sega ni vakadonui na kerekere qori.

Ratou vakadinadinataka vakalevu o Aleksandr, kei na nona vuvale nona veitokoni o Jiova. Ratou sotava na dredre vakailavo ni sega ni rawa ni cakacaka, e vakatabui tale ga me vakayagataka nona ilavo mai na baqe. Ia e kaya: “Au vulica meu vakararavi ga vei Jiova, qai nuitaki koya vakalevu ena ituvaki dredre qo. I liu au sega ni dau kidava tu nona veivuke o Jiova, ia gauna qo au vakadinadinataka sara ga nona vukei au o Jiova ena veiaua e veisiga. E sega vakadua ni biuti keitou vakavuvale, keitou vakila nona veitokoni kei na nona loloma.”

E lomaleqa vakalevu o Sergey ena vuku ni nona veilewai. E lai tauvi strouk kina. Dina ni tauvimate, ia e donu tiko ga nona rai. E kaya: “Eso na gauna e dau dredre meda vosota, ia meda nanuma tiko ni lekaleka ga na veika dredre eda sotava.”

E vakayaloqaqataki Sergey na 1 Korinica 15:58, e kaya ni ‘sega ni ka wale na noda veiqaravi ena cakacaka ni Turaga.’ E kaya o Sergey: “O Jiova e kila vinaka tu na ka kece, ena sega vakadua ni guilecava na ka vinaka eda cakava ena vuku ni yacana.”

Meda masulaki ira tiko ga na tacida mai Rusia era vosota tu na veivakacacani me vica vata na yabaki. Me vakayaloqaqataki ira, qai vakacegui ira na ka e tukuni ena Vosa ni Kalou: “E dau marautaki ira na rerevaki koya o Jiova, o ira na waraka tiko na nona loloma e dei.”—Same 147:11.