Ena ika8 ni June 2020, ena tauca na nona lewa na mataveilewai ena siti o Pskov me baleta na tacida tagane yabaki 61 o Brother Gennady Shpakovskiy. E beitaki ni vakavuna na “tiko yavavala” ena vuku ga ni kena caka na soqoni vaKarisito ena nona vale. E vinakata na dauveibeitaki me totogitaki o Brother Shpakovskiy me vesu me vitu veimama na yabaki.

Ena itekitekivu ni 2018, era vakaraici koya lo na ovisa vakalecaleca na Federal State Security (FSB). Vica vata na vula nodra katona na ka e tukuna kei na ka kece e cakava. Ena yakavi ni ika3 ni June 2018 ni vo e 15 na miniti me 1, era curuma yani vakaukaua nona vale na ovisa nira se soqoni tu eso na tacida, era qai vaqaqara me ono na aua.

Era kauta na vakailesilesi ni FSB na tablet kei na talevoni, era qai kau eso na iVakadinadina i Jiova mera lai vaqaqai. Era vosavakacacataki ira na tacida, qai tukuna nira na vakasakei se beitaki nira daubasulawa. E vakatarogi o Brother Shpakovskiy me yacova na tini ena bogi.

Ena ika19 ni Maji 2019, e beitaki o Brother Shpakovskiy ni tuvanaka na cakacaka e nanumi ni vakavuna na “tiko yavavala.” Ni oti e lima na vula, e beitaki tale ga o koya ni “tokona vakailavo na cakacaka e vakavuna na tiko yavavala.”

Ni voleka mai na siga ni veilewai i Brother Shpakovskiy, eda vakadeitaka ni na tokoni ratou vakavuvale o Jiova me ratou dei, ena vakaicovitaki tale ga nodratou vosota tiko ena yalodina.—2 Veigauna 15:7.