Ena ika9 ni Tiseba 2022, e volavola na Vunivola Tudei ni matabose ni Council of Europe (COE) ina Minisita ni Vanua Tani e Rusia. E kaya me muria o Rusia na rua na lewa a tauca na mataveilewai na European Court of Human Rights (ECHR). E okati kina na lewa bibi a tau ena June 2022, ni sega ni dodonu vakalawa na kena vakatabui na nodra cakacaka na iVakadinadina i Jiova e Rusia. a

E tukuni tale ga ena ivola, dina ni sa sega ni lewe ni COE ena Maji 2022 o Rusia, ia e dodonu tiko ga me muria na lewa e tauca na ECHR me yacova na ika16 ni Seviteba, 2022. Kuria qori, ena raica na Komiti ni Minisita e lewena na matabose na Council of Europe me muri na lewa e tauca na ECHR.

Me tekivu na kena tau na lewa ena June 2022, e tukuna vakavica na Komiti vei Rusia me veisautaka na lewa a tauca na Mataveilewai Cecere ena 2017. E vakatabui kina na nodra cakacaka na iVakadinadina i Jiova. E kaya tale ga vei Rusia “me veisautaka na nona lawa me baleta na vakavu tiko yavavala. Era okati ena lawa qori na iVakadinadina i Jiova mera isoqosoqo era vakavuna na tiko yavavala. E tukuni vei Rusia me kua vaqaqai ira tale na iVakadinadina i Jiova, me sereki ira kece era tu e valeniveivesu, me bokoca tale ga na ivolatukutuku era okati kina mera daubasulawa. Me vakasuka se sauma na vale, qele kei na ka kece e nodra na iVakadinadina i Jiova.” b

Me tekivu nodra vakatatabutaki na tacida, era vesu se totogitaki vakailavo e sivia na 660 na mataveitacini ena vuku ni nodra sokalou. Era sa curu oti e valeniveivesu e sivia e 360. Ena gauna qo, era vesu tiko e 114, eso vei ira era wawa veilewai.

E sivia e 450 na tacida e sa biu na yacadra kei ira na dau vakavuna na tikoyavavala kei ira na batikadi. Qori vakadredretaka na nodra bula na tacidra kei ira na lewe ni nodra vuvale. E rawa nira raica na lewenivanua kece nira sa okati tu na tacida qori mera vakavuna na tikoyavavala, e vakarogorogocataki gona na yacadra. E vakadredretaka tale ga na nodra vaqara cakacaka. Eso vei ira e vakatabui mera vakayagataka na nodra ilavo ena baqe, mera vakavoutaka nodra inisua, mera volitaka nodra vale se qele, mera vakacuru ilavo ena baqe, mera taura na ilavo se veika a volai me nodra se mera volia mada ga na nodra SIM ni talevoni.

Eda marau ni saga na COE me tau vakadodonu na lewa me baleti ira na tacida e Rusia. Ena gauna vata qori, era vakayaloqaqataki na mataveitacini e veiyasai vuravura nira dau wilika ena jw.org ni vukei ira na tacida e Rusia o Jiova me dei nodra vakabauta, yaloqaqa qai marau tiko ga.—Filipai 1:12-14.