NOVEBA 21, 2023
RUSIA

Vakatatabutaki e va na Tacida e Rusia

SARAVA/ROGOCA

Ena ika20 ni Noveba 2023, e kaya na mataveilewai na Proletarskiy District Court of Tula mai Rusia, ni cala o Brother Yevgeniy Godunov, Brother Gurami Labadze, Sister Yuliya Popkova kei Sister Anzhela Putivskaya. Rau vakatatabutaki o Yevgeniy kei Gurami me ono na yabaki, ono na vula. O Yuliya kei Anzhela rau vakatatabutaki me rua na yabaki, ono na vula. Ratou sega ni biu e valeniveivesu ena gauna qo.

Kedratou iTukutuku

Gurami Labadze

Sucu: 1963 (Nigvzara, Georgia)

Me baleti koya: E dau ripea motoka, e teksi draiva tale ga

E mai kilai ira na iVakadinadina i Jiova vei tinana kei ganena. E vakila na yaga ni nona muria na ivakavuvuli vakaivolatabu. E qoroya na nodra veilomani na mataveitacini. Papitaiso ena 1996

Rau vakamau kei Galina ena 1995. E dua na luvedrau tagane

Ka e Tukuna

Cava e dredre kina vei iko mo ciqoma nodra veivuke eso tale?

E sega ni rawarawa baleta niu kila e levu vei ira era sega ni rawati ira. Ia au qai vakasamataka na ka e tukuna o Jisu: “E marau vakalevu o koya e solia na ka, vakalailai o koya e taura na ka.” (Cakacaka 20:35) Au sa qai kila ni dodonu meu ciqoma nodra veivuke na taciqu ni qori ena vakamarautaki ira. Au vakasamataka: ‘Na cava nona rai na yada dravudravua ke nanumi koya o Jisu qai kaya vua me maroroya tiko ga e rua nona ilavo lailai?’ (Marika 12:41-44) Dua na ka noqu vakavinavinakataka nodra kauaitaki au na mataveitacini. E vakavolekati au vei Jiova na ituvaki au sotava qo. Au sega ni wilika tiko ga nona italanoa e dua tale, ia au vakila sara ga nona tokoni au o Jiova.

Yuliya Popkova

Sucu: 1978 (Bogoroditsk, Yasayasa o Tula)

Me baleti koya: E cakacaka ena vanua ni meimei

A sureti koya ina soqoni e dua rau vuli vata. Tekivu vulica na iVolatabu, e mai kila tale ga ni o Jiova na Tama dauloloma. Papitaiso ena 1999

Ka e Tukuna

E vukei iko vakacava nomu veiwekani kei Jiova ena gauna o vesu tu kina vakawawa?

Niu yaco yani ena vanua au vesu kina, au kila ni bibi duadua na noqu veiwekani kei Jiova. Na noda ogaoga ena ka vakayalo e duatani mai na noda bucina noda veiwekani kei Jiova. Ni bera niu vesu, au sasaga meu bucina noqu veiwekani kei Jiova, qo sara ga na gauna meu vakadinadinataka kina vua niu nona itokani yalodina. Na noqu kila ni mareqeta qori o Jiova, e uqeti au meu yalodina tiko ga vua. Ia e dua ga na ka au na sega ni cakava, ya meu vakacudrui koya.

Na nodratou ivakaraitaki na tacida qo e vakadeitaka ke da nuitaki Jiova qai muria nodrai ivakaraitaki ni vakabauta na cavuti ena iVolatabu, eda na rawata tale ga na vakacegu kei na inuinui.—Roma 15:4.

Veitaravi ni Gauna

Maji 25, 2021

Ratou tekivu vaqaqai
Epereli 13, 2021

Caka na vaqaqara e vale, rau qai vesu o Anzhela kei Yuliya
Epereli 14, 2021

Rau vesu vakawawa o Anzhela kei Yuliya. E vesu qai beitaki o Yevgeniy. E vakatatabutaki o Gurami
Epereli 16, 2021

Vesu vakawawa o Yevgeniy
Me 20, 2021

Ratou sere mai o Anzhela, Yevgeniy, kei Yuliya, qai vakatabui me ratou biuta nodratou vale
Julai 22, 2021

Laveti nodratou vakatatabutaki i vale o Anzhela, Yevgeniy, kei Yuliya, qai vakatabui me ratou gole ina dua tale na vanua
Julai 23, 2021

Laveti nona vakatatabutaki i vale o Gurami, qai vakatabui me gole ina dua tale na vanua
Me 11, 2023

Tekivu nodratou veilewai
Noveba 20, 2023

Beitaki ni ratou cala qai vakatatabutaki

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU