Ena ika17 ni Tiseba 2020, e tukuna na mataveilewai na Leninskiy District Court e Rusia, ni cala o Brother Ruslan Alyev. Ena sega ni vesu, ia ena vakatatabutaki me rua veimama na yabaki.

E vakila tu ga na “vakacegu ni Kalou” o brother Ruslan ni bera nona siga ni veilewai. (Filipai 4:7) E tukuna ena nuidei vei ira nona itokani: “Au sega ni leqataka na macala ni veilewai. E vakatara tu qo o Jiova ni kila niu rawa ni vosota. Ena tokoni keda tu ga. Se mani cava e yaco au na yalodina tu ga vua.” E kila vinaka o brother Ruslan nira nanumi koya tu ena masu na mataveitacini e veiyasa i vuravura me rawa ni yalodina tiko ga. Qori e “veivakacegui” sara ga vua.

Ena ika14 ni Tiseba 2020, e tukuna ena doudou o Ruslan ina mataveilewai: “Ena 2,000 na yabaki sa oti a veilewaitaki e dua na tagane e yabaki 33, e beitaki ni saqata tiko na matanitu qai okati me dua na daubasulawa. Ia e laurai ena ivakadinadina kece ni vu ga ni nona vesu, oya nona qarava na Kalou o Jiova. E veicalati na ka era tukuna na ivakadinadina, e sega ni rawa tale ga ni vakadinadinataki na ka kece e beitaki kina. Ia e vakataulewataki ga ni cala. Na tagane qori o Jisu Karisito.

“Ia sa oti qo e 2,000 na yabaki, o au tale ga au yabaki 33 au veilewaitaki qai beitaki niu vakavuna na tiko yavavala ena matanitu, au vakaleqa tale ga nodra tiko vakacegu na lewenivanua. . . . Au kurabuitaka na ka au beitaki kina qo, e sega tale ga na kena yavu vinaka.”

E vakacala tale ga o Ruslan nona beitaki ni vakavuna na veicati vakamatatamata kei na veicati vakalotu. E kaya: “Au susu ena itovo vakavanua vakaRusia, vaka Azerbaijan kei na vakaUkrain. Au mareqeta kece na itovo vakavanua qori. . . . Eso noqu itokani era cavutu mai Aferika era vosa vakavalagi, eso tale ga era vosa vakaJaina. . . . Au sucu mai Azerbaijan. Sa dede nodra veicati tu na lewenivanua e Azerbaijan kei Armenia. Ia e dua noqu itokani dredre e kai Armenia, a vakadinadina tale ga ena noqu vakamau. Na lotu au lewena e vakavulici au meu lomani ira na tamata mai na duidui vanua, duikaikai, lotu, se kedra irogorogo. . . . Au kurabuitaka niu beitaki niu uqeti ira tiko na lewenivanua mera dokadoka, qai vakavuna na veileti vakamatatamata.”

E veiuqeti nida rogoca nodra yaloqaqa na tacida e Rusia mera vakayagataka nodra gauna ni veilewai mera vakadinadinataki Jiova kina. Eda nuidei ni o Jiova ena vakalougatataka noda soli ivakadinadina vei ira na vakailesilesi me vagolei ira mai kina na yalomalumalumu.—Maciu 10:18.