Ena ika24 ni Noveba 2020, e vakataulewataka na mataveilewai na Petropavlovsk-Kamchatskiy City Court of the Kamchatka Territory e Rusia, ni cala o Brother Sergey Ledenyov. Ena sega ni bala e valeniveivesu, ia ena vakatatabutaki me lima na yabaki.

Ena iotioti ni siga e rogoci kina na nona kisi, e vakamacalataka o Bro Sergey na ka e vauci ni dua na iVakadinadina i Jiova. E kaya: “O Jiova e sega ni yaca ni dua na ilawalawa tamata, se dua na isoqosoqo se matalotu. Qo na yaca sara ga ni Kalou. Ena nona ivola na parofita o Aisea ena iVolatabu, e vakatokai ira kina na nona tamata yalodina o Jiova mera nona ivakadinadina. Keimami vakayacani gona me keimami iVakadinadina i Jiova ena dua na soqo ena 1931. Qori e vakaibalebaletaka ni keimami lesi me keimami vakadinadinataka na Kalou. Ya na neimami tukuna yani vei ira eso tale ni o koya na Dauveibuli, e noda iVakabula, qai Turaga Cecere ni lomalagi kei na vuravura. Keimami vunautaka tale ga na sala ena vakalougatataka kina na kawatamata. Qo e dua dina na itavi dokai vei au kei ira keimami vakabauta vata.”—Aisea 43:10.

E doudou ni tukuna o Sergey ina mataveilewai: “Au sega vakadua ni madualaka e dua na ka niu sega ni voroka e dua na lawa. E savasava tu na noqu lewaeloma vua na Kalou kei ira na tamata.”