Ena ika20 ni Janueri 2021, e kaya na mataveilewai ni yasana na Birobidzhan District Court of the Jewish Autonomous Region e Rusia, ni cala o Brother Yevgeniy Golik. Ena sega ni curu e valeniveivesu, ia ena vakatatabutaki me rua veimama na yabaki. Ena kerea me rogoci tale nona kisi.

Yevgeniy Golik

• Sucu: 1975 (Birobidzhan, e Jewish Autonomous Region)

• Kena italanoa: Vakaivola ena tuki kaukamea (welder). Cakacaka ena vanua e dau vakarautaki kina na livaliva (boiler-room operator). Ni bera ni iVakadinadina i Jiova, a lewena tu na mataivalu e Rusia

  Vulica na ka dina vei tinana. Na ka e vulica ena iVolatabu e saumi kina nona taro me baleta na inaki ni bula, e uqeti koya tale ga me kauaitaki ira eso tale

Ena ika17 ni Me 2018, era curuma vakaukaua e 150 na vakailesilesi ni Federal Security Service (FSB) nodratou vale e 22 na tacida ena siti o Birobidzhan, ena tokalau kei Rusia. E vakatokai na ka era cakava qori me “Siga ni Lewa.” Ratou beitaki o Brother Yevgeniy Golik, kei na 21 tale na tacida ena Jewish Autonomous Region. Ena ika29 ni Janueri 2020, sa tekivu veilewaitaki kina o Yevgeniy.

Era vakaraitaka na dauveibeitaki na ivakadinadina e okati kina na vidio ni nona vulica tiko o Yevgeniy na iVolatabu, kei na levu tale na ivola vakaivolatabu.

E mosimosi ni o beitaki ena dua na ka o sega ni cakava. Ia e kaya o Yevgeniy: “Niu dei ena noqu ituvatuva vakayalo, qori e vukei au meu vakananuma kina e levu na ka me baleti Jiova, au sega tale ga ni vakasamataka kina vakalevu na kequ ituvaki. E vakavu marau tale ga na vosa veiuqeti ena iVolatabu. Qori e vukei au meu wasea vei ira eso tale na itukutuku veivakacegui

E yaga vakalevu nona vakasamataka vakatitobu na Same 23:4. E kaya: “[Na tikinivolatabu qori] e vukei au meu yaloqaqa, qai marau tiko ga. Ke mani leqataki mada ga noda bula, eda kila ni o Jiova ena sega vakadua ni biuti keda.”

Era tokoni Yevgeniy tale ga eso tale na tacida. E kaya: “E vakayaloqaqataki au vakalevu nodra gole mai na mataveitacini ina vanua ni veilewai. E vukei au tale ga vakalevu o watiqu ena gauna dredre qo. Au vakila tu ga na marau. Dua na ka na levu ni kakana vakayalo, vakayago tale ga au kania. E levu tale ga na veitokoni.”

E vakadeitaka o Yevgeniy ni na yalodina tu ga vei Jiova. O ira era se bera ni sotava na veivakacacani, e kaya o Yevgeniy: “Vulica na noda sere ni soqoni, vakavulica rawa na lomamu mo lomani ira na kemu meca. Vakavulici iko tale ga mo marau tu ga se mani dredre cava o sotava.”

Me uqeti keda mada ga na ka eda vulica vei ira na tacida e Rusia. O Jiova e solia vei ira na kaukaua mera vosota na veika dredre, ena cakava tale ga qori vei keda.—Same 29:11.