Ena ika13 ni Okosita, 2019 e vakatulewataka na mataveilewai ena siti o Kirov me sere o Brother Andrey Suvorkov e yabaki 26, ni vesu tu e nona vale. Sa soli vua na galala, ia se totogitaki tiko.

Me vaka e ripotetaki taumada, e vesu o Brother Suvorkov, tamana vakacabecabe kei na tolu tale na tacida tagane nira curuma vakaukaua na ovisa era vakamatavulo e 19 na vale e Kirov ena ika9 ni Okotova, 2018.

E kaya o Brother Suvorkov ena gauna e curuma kina na ovisa nodratou vale: “E vesu e levu na iyaya mareqeti keitou taukena. Ia keirau sega ni leqataka kei watiqu na veika qori, ni keirau saga tiko me keirau bula rawarawa, kua tale ga ni domodomoiyau. E vakacegui keirau na ivakasala ena Maciu 6:21, ‘na vanua e tiko kina na nomu iyau, ena tiko tale ga kina na yalomu.”

Oti ga na kena yaco na ituvaki qori, ratou beitaki ena basulawa o Brother Suvorkov, tamana vakacabecabe, kei na tolu tale na tacida, ni ratou lagasere, vulica na ivola vakaivolatabu, ratou yadua tale ga na iVolatabu na New World Translation of the Holy Scriptures vakaRusia. Ratou vesu toka vakawawa ena dua na vale ni bera ni dikeva na mataveilewai nodratou kisi me ratou sere, se bala e valeniveivesu.

E vakamacalataka o Brother Suvorkov na ka e yaco: “Rua na bogi noqu vesu tu vakawawa, sega ni cegu noqu masu. Au kila o Jiova e rogoca noqu masu, ena tokoni au tale ga. Au nanuma na sere ni isoqosoqo qai lagata. Oti au sa kila vinaka e sivia e 50 na sere kei na qaqana.”

Ni ratou waraka tiko nodratou veilewai, e vakatulewataka na mataveilewai me ratou bala e valeniveivesu o Brother Suvorkov kei ratou na kena vo. Na imatai ni macawa e vesu kina o Brother Suvorkov, e saga sara me vukei ira eso tale. E kaya: “Niu masu au na cavuta na yacadra na tacida, au vola tale ga na ivola veiuqeti vei ira na tacida au nanuma rawa na yaca ni nodra itikotiko. E vakamarautaki au dina.”—Cakacaka 20:35.

Toso na gauna, ratou tokitaki kece na tacida qori me ratou vesu e nodratou vale, vakavo ga o Brother Andrzej Oniszczuk. Qori na imatai ni tacida e Kirov me soli vua na galala me biuta nona vale.

E kaya o Brother Suvorkov: “E sega ni tukuni rawa na levu ni noqu marau niu nanuma lesu na veika au sotava e valeniveivesu. . . . Au sega ni kila noqu veisiga nimataka, seu na vesu tale. Ia keu vesu mada ga, au nuidei ni na tokoni au o Jiova kei na nona isoqosoqo. Au sega ni rere keu vesu ena vuku ni noqu vakabauta.”