28 Epereli, 2021
RUSIA
Vakayaloqaqataki Brother Anton na Masu kei na Noda Sere
IROGO VOU | Beitaki ni Cala o Brother Ostapenko
Ena ika25 ni Okotova 2021, e vakataulewataka na mataveilewai na Sharypovo City Court of the Krasnoyarsk Territory mai Rusia, ni cala o Brother Anton Ostapenko. Sa vakatatabutaki me ono na yabaki, tolu na vula. Ena sega ni biu e valeniveivesu ena gauna qo.
Kena iTukutuku
Anton Ostapenko
Sucu: 1991 (Ekibastuz, Kazakhstan)
Me baleti koya: E dau cakacaka ena kabani ni livaliva. Ni se itabagone, e vakavulici koya kei ganena ena iVolatabu o tinana. Papitaiso me iVakadinadina i Jiova ena 2005
Rau vakamau kei Natalya ena 2015. Rau taleitaka vakaveiwatini na vakasisisi ena waicevata. E dau taleitaka o Anton na qiri qita, siwa kei na qito tennis
iTukutuku ni Veilewai
Ena ika19 ni Epereli, 2019, era vaqaqara na vakailesilesi e Sharypovo ena tini nodra vale na mataveitacini, era vakatarogi tale ga eso na tacida. E mani vesu tu me wawa veilewai o Brother Anton Ostapenko me yacova na ika20 ni Tiseba 2019. E beitaki ni tuvanaka na cakacaka ni isoqosoqo e vakavuna na “tikoyavavala.”
Na ono na vula e vesu tu kina o Anton, e dau sorova na tagi ena eso na gauna ena levu ni nona rarawa.
E vakayaloqaqataki Anton vakalevu na masu. E kaya: “Au dau masuti Jiova me vukei au meu vosota. Ia e levu sara na ka au vulica, au qai vakaukauataki vakayalo. . . . Au raica ni gauna eda sotava kina na ituvaki dredre va qo, eda rawa sara ga ni bulataka na veika kece eda vulica tu mai. Nida tu e valeniveivesu, e dau dredre me soli vei keda na iVolatabu. Au dau vulica tu ga na veika me baleti Jiova, ia na gauna au vesu kina e vakaraitaka sara ga vei au o Jiova na nona veitokoni! Qori e vakamarautaki au vakalevu, au vulica kina ni Kalou Kaukaua duadua, qai Tama dauloloma. E kila vinaka na keda ituvaki, e tu vakarau me vukei au ena gauna donu, kei na sala au sega ni namaka.”
E dau vakayaloqaqataki koya tale ga na noda sere ni soqoni. E kaya: “Keirau dau lagata vakaveiwatini na noda sere, qai saga me keirau kila vinaka na qaqana. Qori e yaga vakalevu ena gauna au vesu tu kina. Ni dau boko na cina, au dau masu qai lagata na noda sere. Qori e vukei au meu lomavakacegu qai moce vinaka.”
E rawa ni cakacaka saumi o Anton ena gauna e waraka tiko kina na macala ni nona veilewai. Ia e vakatabui me biuta na yasayasa o Sharypovo. E sega kina ni rawa ni kauti tinana me laurai vakavuniwai.
Eda nuidei ni o Jiova ena vukei ira na tacida mera vakila na vakacegu nira vosota tiko kina na veitusaqati.—Joni 14:27.
Rawa ni o Wilika Tale ga
ITUKUTUKU VOU
Vesu ena Vuku ni Nodra Vakabauta—Rusia
Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.