Ena ika14 ni Julai 2021, e vakataulewataka na Zeyskiy District Court of the Amur Region mai Rusia, ni cala o Brother Konstantin Moiseyenko. E vakatatabutaki me ono na yabaki, ia ena sega ni biu e valeniveivesu ena gauna qo.

Konstantin Moiseyenko

• Sucu: 1976 (Abakan, Republic of Khakassia)

• Me baleti koya: E rua na tacina tagane rau drua. Ni se gone, e dau taleitaka na karate. E kenadau ena tabana ni kompiuta

  Rau vakamau kei Margarita ena1998. E dau droinitaka na iculacula ni sulu vovou o Margarita. Rau vulica na iVolatabu kei ira na iVakadinadina i Jiova ena 2000. E uqeti koya na kena donu vinaka na itukutuku makawa ena iVolatabu, kei na vakayacori ni parofisai. Rau papitaiso vakaveiwatini ena icavacava ni yabaki 2000

  Sa takali o tamana ena 10 na yabaki sa oti. E dau qaravi nona bu e mataboko me ono na yabaki. Se qai takali wale tiko ga qo

Ena ika11 ni Maji, 2019, era tekivu vaqaqai Brother Konstantin Moiseyenko na tabana ni Investigative Department of the Federal Security Service (FSB) ena yasayasa o Amur. Era mani vaqaqara ena lima nodra vale na iVakadinadina i Jiova, wili kina nodratou vale o Brother Konstantin. Era kauta na kompiuta, talevoni kei na so na ka vakaivola. E beitaki o Brother Konstantin ni dau vakavuna na tikoyavavala. E sega ni rawa kina ni vakayagataka nona ilavo ena baqe.

E uqeti Brother Konstantin na nodrau tiko vakaveiwatini ena soqo ni veiwasewase e Seoul, mai Sauca Korea ena 2018. A kerea kina na tacida e vunau mera tucake na mataveitacini era vesu ena vuku ni nodra tawaveitovaki. E kaya o Brother Konstantin: “Voleka nira tucake kece na tacida tagane era tiko ena soqo. E qai kaya o koya e vunau: ‘Raici ira mada, era bula vinaka qai toso vinaka tiko!’ E rawa nida vosota na gauna eda tusaqati kina.” A wiliki tale ga na Same 23:5, e tukuni kina: “Oni vakarautaka na noqu teveli e matadra na kequ meca. Oni vakabulabulataka na uluqu ena waiwai, e sinai vinaka na noqu bilo.”

E vakavinavinakataka vakalevu o Brother Konstantin na nodra veitokoni na mataveitacini. E tarai koya nira kauai tiko mai na tacida e veiyasa i vuravura ena nona veilewai ra qai dau masulaki koya. E kaya: “Vaka ga au raici ira na mataveitacini e veiyasa i vuravura nira tu e yasadra na tacida era veilewaitaki tiko e Rusia. Era muria vinaka na ka e tukuni ena 1 Joni 3:16: ‘E noda itavi gona meda solia tale ga na noda bula ena vukudra na tacida.’”

Eda marau ni tokoni ira tiko ga na tacida mai Rusia o Jiova. E solia tale ga vei keda na “igu kei na kaukaua” nida sotava tale ga na ituvaki va qo.—Same 68:35.