20 JANUERI, 2022
RUSIA

Vakayaloqaqataki Ratou na Le Vitu na Tacida

SARAVA/ROGOCA

Ena vakarau tauca na mataveilewai na Pechora City Court of the Komi Republic e Rusia na lewa me baleti Brother Nikolay Anufriyev, Brother Eduard Merinkov, Brother Gennadiy Polyakevich, Brother Aleksandr Prilepskiy, Brother Viktor Shchannikov, Brother Gennadiy Skutelets, kei Brother Aleksandr Vorontsov. E se bera ni kerea na dauveibeitaki na kedratou itotogi.

Veitaravi ni Gauna

28 Janueri, 2020

Era vaqaqara na ovisa ena 12 na nodra vale na iVakadinadina i Jiova ena Komi Republic. Rau beitaki kina o Brother Polyakevich kei Brother Skutelets
30 Janueri, 2020

E vesu me wawa veilewai o Gennadiy Polyakevich qai vakatatabutaki tu e vale o Gennadiy Skutelets
20-25 Me, 2020

Era vakatarogi tale ga na tacida e Pechora me rawa nira veilewaitaki. E vakarerei e dua na tacida tagane mani tauvi koya na strouk. E sa bula vinaka tale
26 June, 2020

E vakabalavutaki na nona vesu o Gennadiy Polyakevich. E beitaki Gennadiy Polyakevich na turaga ni lewa “ni nakita nona cala bibi,” okati tale ga kina na nona kaya me “yalodina tiko ga vei Jiova ke mani tusaqati mada ga vei ira na vakailesilesi”
24 Okosita, 2020

Era vaqaqara na vakailesilesi ena nodra vale e 12 na iVakadinadina i Jiova
10 Noveba, 2020

Ratou tekivu veilewaitaki o Aleksandr Prilepskiy, Aleksandr Vorontsov, Eduard, Nikolay, kei Viktor. E okati vata kei na nodrau kisi ni veilewai o Gennadiy Polyakevich kei Gennadiy Skutelets
25 Noveba, 2020

E sereki o Gennadiy Polyakevich ni oti nona wawa veilewai tu e valeniveivesu me 300 na siga. E qai vakatatabutaki tu e vale
27 Janueri, 2021

E sereki o Gennadiy Skutelets, ni oti nona vakatatabutaki tu e vale me 363 na siga

Kedratou iTukutuku

Eduard Merinkov

Sucu: 1975 (Pechora)

Me baleti koya: Ni se gone, e dau taleitaka na cakava na ka e tautuba, me vaka na vodo waqa ena uciwai na Pechora. Cakacaka ena gaunisala ni sitima. E papitaiso ena 1993. Rau vakamau kei Valentina ena 1997. E dua na luvedrau yalewa o Iolanta

Ka e tukuna

Na cava na nomu ituvatuva vakayalo, e vukei iko vakacava qori mo vosota?

Dua na ka au taleitaka tiko ena gauna qo . . . na noqu kila vinaka na sere ni [JW Broadcasting], meu dau lagata tale ga. Au vakila kina na nona tokoni au o Jiova. Vanua cava ga au lako kina, au na lagata—keu tiko e vale, ena motoka, ena vanua mada ga ni cakacaka Au dau taleitaka tale ga na Same 27 au qai dau wilika vakawasoma.

Na cava e vukei iko mo kua ni soro?

E vakamarautaki au vakalevu niu kila ni vinakata na Dauveibuli Cecere ni lomalagi kei vuravura me noqu itokani. Se mani ituvaki dredre cava au sotava, au vinakata meu qaravi Jiova me tawamudu. Au na saga vakaukaua meu yalodina tiko ga vei Jiova me yacova na icavacava!

Aleksandr Prilepskiy

Sucu: 1964 (Pechora)

Me baleti koya: Ni se gone, e dau taleitaka na qito tennis. E dau qiri qita. E papitaiso ena 1994. Rau vakamau kei Vera ena 1990. E dua na luvena yalewa, e rua na makubuna tagane

Ka e tukuna

Cava e vukei iko mo vosota?

E uqeti au na loloma i Jiova kei na noqu nuitaka na veigauna vinaka e se bera mai. Au vakadeitaka kina meu vakatotomuri Jisu qai yalodina tiko ga vei Jiova. E dau vakayaloqaqataki au tale ga na noqu dau sarava na ibulibuli totoka.

Na ivakasala cava o na tukuna vei ira na mataveitacini era na vakarau tusaqati?

Au nuitaka nira na vakayagataka vinaka na mataveitacini na isolisoli vakayalo kece e vakarautaki vei keda. Qori ena vukei ira mera yadra tiko ga vakayalo qai lomani Jiova kei na nona itovo talei. Nira cakava qori, era na dau veilomani qai dau veivosoti.

Aleksandr Vorontsov

Sucu: 1984 (Pechora)

Me baleti koya: Ni se gone, e vulica na veika me baleti Jiova mai vei ratou na wekana kei na nona itokani. E vulica na cakacaka vakamatai. E papitaiso ena 2012. Rau vakamau kei Yelena ena 2016

Ka e tukuna

E vakayaloqaqataki iko vakacava e dua na tacida mo vosota?

Ni oti dua noqu veilewai, e kaya vei au e dua na tacida tagane, ni a masulaki au tiko ni bera na veilewai kei na gauna au veilewaitaki tiko kina. Au lai nanuma kina na ivakaraitaki i Niemaia. Au cakava tale ga qori ena noqu veilewai tarava, au masu lo tiko ena gauna kece au tiko kina ena vale ni veilewai.—Niemaia 2:4.

Na ivakaraitaki vakaivolatabu cava e vukei iko mo vosota?

Au dau qoroya na ivakaraitaki i Esiteri. E bula donuya na gauna era tusaqati tiko kina na wekana. E vinakati me yaloqaqa me rawa ni taqomaki ira. Au dau biuti au ena kena ituvaki o Esiteri. Qori e vukei au meu taqomaki ira na tacida ena gauna au veilewaitaki kina.

Eda nuidei ni ratou na vakalougatataki na tacida ena gauna qo kei na veigauna se bera mai ni ratou nuitaka na vinaka i Jiova.—Same 27:13.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU